Nikhil: రిచా చద్దా ట్వీట్‌పై నిఖిల్‌ ఆగ్రహం.. ఆమెకు బుద్ధి లేదంటూ నెటిజన్ల ఫైర్‌..

హైదరాబాద్‌: ‘Galwan says hi’ అంటూ బాలీవుడ్‌ నటి రిచా చద్దా (Richa Chadha) చేసిన ట్వీట్‌పై నటుడు నిఖిల్‌ (Nikhil) ఆగ్రహం వ్యక్తం చేశాడు. అనుక్షణం దేశాన్ని రక్షిస్తోన్న సైనిక దళాలను అవమానించడం తగదని అన్నాడు. ‘‘మనల్ని, మన దేశాన్ని రక్షించడం కోసం గల్వాన్‌ దాడుల్లో 20మంది భారతీయ సైనికులు తమ ప్రాణాలు కోల్పోయారు. ఆ సైనికుల త్యాగాల గురించి చదువుతుంటే ఇప్పటికీ కన్నీళ్లు ఆగవు. రాజకీయాలు మర్చిపోండి. మన దేశ ఆర్మీని ఎప్పుడూ గౌరవించాలి. అమానించకూడదు. రిచా దయచేసి గౌరవించండి. దేశం తర్వాతే ఏదైనా అని తెలుసుకోండి’’ అని నిఖిల్‌ ట్వీట్‌ చేశాడు. ‘గల్వాన్‌ హాయ్‌ చెబుతోంది’ అంటూ రిచా చేసిన ట్వీట్‌ వివాదాస్పదంగా మారిన విషయం తెలిసిందే. ఈ ట్వీట్‌ని తప్పుబడుతూ మంచు విష్ణు, అక్షయ్‌కుమార్‌తోపాటు పలువురు సినీ, రాజకీయ ప్రముఖులు ఆమెపై మండిపడుతున్నారు. నెటిజన్లు సైతం తీవ్ర ఆగ్రహం వ్యక్తం చేస్తున్నారు. ఆమెకు బుద్ధి లేదంటూ వరుస ట్వీట్స్‌ చేస్తున్నారు.

‘పాకిస్థాన్‌ ఆక్రమిత కశ్మీర్‌లోని కొన్ని ప్రాంతాలను తిరిగి స్వాధీనం చేసుకునే విషయంలో ప్రభుత్వం నుంచి వచ్చే ఏ ఆదేశానికైనా సైన్యం ఎల్లప్పుడూ సిద్ధంగా ఉంటుంది. వారికి (పాక్‌ను ఉద్దేశించి) గట్టి సమాధానం ఇస్తాం’ అని నార్తర్న్‌ ఆర్మీ కమాండర్ లెఫ్టినెంట్‌ జనరల్‌ ఉపేంద్ర ద్వివేది అన్నట్లు ఓ నెటిజన్‌ ట్వీట్‌ చేశాడు. దీనిపై రిచా స్పందిస్తూ ‘గల్వాన్‌ హాయ్‌ చెబుతోంది’ అని ట్వీట్‌ చేసింది. ఈ ట్వీట్‌పై తీవ్ర విమర్శలు వెల్లువెత్తడంతో..  ఆమె క్షమాణపలు చెప్పింది.