ఇల్లు అద్దెకు దొరక్క ఇబ్బందిపడుతోన్న బిగ్‌బాస్‌ బ్యూటీ

ముంబయి: ముంబయి (Mumbai) మహానగరంలో ఇల్లు అద్దెకు దొరక్క ఇబ్బందులు పడుతున్నారు బిగ్‌బాస్‌ (హిందీ) నటి ఉర్ఫీ జావేద్ (Urfi Javed)‌. తన వస్త్రాధారణ కారణంగా యజమానులు ఇంటిని అద్దెకు ఇచ్చేందుకు అంగీకరించడం లేదని ఆమె వాపోయారు. ఇదే విషయాన్ని తెలియజేస్తూ ఆమె తాజాగా ట్వీట్స్‌ పెట్టారు. ‘‘నా డ్రెస్సింగ్‌ విషయంలో ఇబ్బంది ఉండటం వల్ల కొంతమంది యజమానులు నాకు ఇల్లు అద్దెకు ఇవ్వడానికి సుముఖంగా లేరు. పలువురు రాజకీయనేతల నుంచి ఇటీవల కాలంలో నాకు బెదిరింపులు వచ్చిన కారణంగా మరికొంతమంది ఇంటిని అద్దెకు ఇవ్వను అంటున్నారు. ముంబయిలో అద్దె ఇంటిని పొందడం చాలా కష్టం’’ అని ఆమె పేర్కొన్నారు. దీనిపై ఓ నెటిజన్‌ స్పందిస్తూ.. ‘‘నేనూ ఇలాంటి పరిస్థితినే ఎదుర్కొన్నాను. మీకు త్వరగా మంచి నివాసం దొరకాలని కోరుకుంటున్నా’’ అని రిప్లై ఇచ్చాడు. ‘‘ప్రతిసారీ ఇదే జరుగుతోంది. పెళ్లి కాని ఓ నటికి ఇల్లు అద్దెకు దొరకడం అసాధ్యమే’’ అంటూ ఆమె బదులిచ్చింది.

హిందీలో ప్రసారమైన పలు ధారావాహికల్లో నటించి ఉర్ఫీ జావేద్‌ ప్రేక్షకుల్ని అలరించారు. సీరియల్స్‌లో నటిస్తోన్న తరుణంలోనే ఆమెకు ప్రముఖ రియాల్టీ షో ‘బిగ్‌బాస్‌’లో పాల్గొనే అవకాశం వచ్చింది. అలా, 2021లో ప్రసారమైన ‘బిగ్‌బాస్‌ ఓటీటీ’లో ఆమె కంటెస్టెంట్‌గా పాల్గొన్నారు. అయితే, గత కొంతకాలంగా విభిన్నమైన డ్రెస్సింగ్‌ స్టైల్‌తో ఆమె వార్తల్లో నిలిచింది.