Yashoda: ‘యశోద’.. ఎవరో తెలుసా!

‘‘నీకెప్పుడైనా రెండు గుండె చప్పుళ్లు వినిపించాయా? బిడ్డను కడుపులో మోస్తున్న తల్లికి మాత్రమే అది వినిపిస్తుంది’’ అంటోంది సమంత (Samantha). ఆమె ప్రధాన పాత్రలో నటించిన పాన్‌ ఇండియా చిత్రం ‘యశోద’ (Yashoda). హరి - హరీష్‌ సంయుక్తంగా తెరకెక్కించారు. శివలెంక కృష్ణప్రసాద్‌ నిర్మాత. ఉన్ని ముకుందన్‌, వరలక్ష్మీ శరత్‌ కుమార్‌, రావు రమేష్‌, మురళీ శర్మ తదితరులు కీలక పాత్రలు పోషించారు. ఈ సినిమా నవంబరు 11న ప్రేక్షకుల ముందుకు రానుంది. ఈ నేపథ్యంలోనే హీరో విజయ్‌ దేవరకొండ (Vijay Deverakonda) గురువారం ఈ చిత్ర తెలుగు ట్రైలర్‌ను విడుదల చేశారు. ప్రచార చిత్రాన్ని తీర్చిదిద్దిన తీరును బట్టి.. సరోగసి (అద్దె గర్భం) నేపథ్యంలో జరిగే ఒక క్రైమ్‌ చుట్టూ అల్లుకున్న కథతో ఈ సినిమా సాగనున్నట్లు తెలుస్తోంది. డబ్బు అవసరం ఉన్న మహిళల్ని సరోగసి ఆశ చూపి ప్రత్యేకంగా ఏర్పాటు చేసిన ఓ పెద్ద భవంతిలో ఉంచుతుంది ఒక ముఠా. అక్కడికి సమంత కూడా అద్దె గర్భం మోయడానికి వస్తుంది. అయితే దీని వెనుక ఓ పెద్ద క్రైమ్‌ జరుగుతుంటుంది. మరి ఆ క్రైమ్‌ ఏంటి? దాన్ని యశోద ఎలా పసిగట్టింది? ఈ క్రమంలో ఆమెకు ఎలాంటి సవాళ్లు ఎదురయ్యాయి? అన్నది మిగతా కథ. సమంత నటన, యాక్షన్‌ ప్రచార చిత్రానికి ప్రధాన ఆకర్షణగా నిలిచాయి. ‘‘యశోద ఎవరో తెలుసు కదా.. ఆ కృష్ణ పరమాత్మని పెంచిన తల్లి’’ అంటూ ట్రైలర్‌ చివర్లో సామ్‌ చెప్పిన డైలాగ్‌ హైలైట్‌గా నిలిచింది. ఈ చిత్రానికి సంగీతం: మణిశర్మ, ఛాయాగ్రహణం: ఎం.సుకుమార్‌.