Vishwak Sen: ఆ పదం వాడినందుకు సారీ: విశ్వక్‌సేన్‌

ఇంటర్నెట్‌ డెస్క్‌: విశ్వక్‌సేన్‌.. ప్రస్తుతం సోషల్‌ మీడియాలో ట్రెండింగ్‌లో ఉన్న పేరు. ఫేస్‌బుక్‌, ఇన్‌స్టాగ్రామ్‌, ట్విటర్‌.. ఇలా ఏ యాప్‌ ఓపెన్‌ చేసినా అతడి గురించే ఎక్కువ పోస్ట్‌లు కనిపిస్తున్నాయి. కారణం.. ఓ టీవీ ఛానల్‌ డిబేట్‌కు హాజరై అసభ్యకరమైన ఓ పదం వాడటం. ఈ విషయంపై ఓ ప్రెస్‌మీట్‌లో విశ్వక్ స్పందించాడు. దెబ్బతగిలితే అమ్మ అని ఎలా అంటామో.. ఆ సమయంలో అదే ఫీలింగ్‌తో అలా అన్నానని, యువకుడిని కావడం వల్ల తప్పు జరిగిందన్నాడు. ఒకే ఒక్క పరుష పదం వాడటం తప్ప తానెలాంటి తప్పు చేయలేదని పేర్కొన్నాడు. ఆ ఒక్క పదం వాడినందుకు క్షమాపణలు చెప్పాడు.

విశ్వక్‌సేన్‌ నటించిన ‘అశోకవనంలో అర్జున కల్యాణం’ చిత్రం మే 6న విడుదలకానుంది. ఈ సినిమా ప్రచారంలో భాగంగా హైదరాబాద్‌ నగర రహదారిపై అతడు ఓ ప్రాంక్‌ వీడియోను చేశాడు. ప్రమోషన్‌ పేరిట న్యూసెన్స్‌ క్రియేట్‌ చేస్తున్నారనే ఉద్దేశంతో టీవీ ఛానల్‌ డిబేట్‌ నిర్వహించి, దానికి విశ్వక్‌ను ఆహ్వానించింది. ఈ క్రమంలో యాంకర్‌, విశ్వక్‌కు మధ్య వాగ్వాదం చోటుచేసుకుంది.