Ravi Teja: రవితేజకు జోడీగా బాలీవుడ్‌ నటి... ఆ క్రేజీ ప్రాజెక్టు ఏదంటే?

ఇంటర్నెట్‌ డెస్క్‌: రవితేజ ప్రధాన పాత్రలో ‘దొంగాట’ ఫేం వంశీ తెరకెక్కిస్తున్న బయోపిక్‌ ‘టైగర్‌ నాగేశ్వరరావు’. స్టూవర్టుపురం గజదొంగ జీవితాధారంగా రూపొందుతోంది. ఈ సినిమాలో కథానాయికగా బాలీవుడ్‌ నటి, కృతి సనన్‌ సోదరి నుపుర్‌ సనన్ ఎంపికైంది. ఆమెను ఈ ప్రాజెక్టులోకి ఆహ్వానిస్తూ చిత్ర బృందం ఓ పోస్టర్‌ను విడుదల చేసింది. అక్షయ్‌ కుమార్‌తో కలిసి ‘ఫిల్హాల్‌’ అనే వీడియో సాంగ్‌లో నటించి మంచి గుర్తింపు తెచ్చుకున్న నుపుర్‌ ‘నూరని చెహ్రా’ అనే చిత్రంతో తెరంగ్రేటం చేయనుంది. ఈ సినిమా విడుదలవకముందే ‘టైగర్‌..’లో అవకాశం అందుకుని అందరి దృష్టిని ఆకర్షిస్తోంది.

1970ల నేపథ్యంలో సాగే ఈ చిత్రం పాన్‌ ఇండియా స్థాయిలో తెరకెక్కుతోంది. ఉగాది సందర్భంగా ఏప్రిల్‌ 2న ప్రారంభంకానుంది. అదే రోజు ప్రీ లుక్‌ విడుదలవుతుంది. ఇప్పటికే టైటిల్‌ పోస్టర్‌ సినిమాపై ఆసక్తి రేకెత్తించింది. అభిషేక్‌ అగర్వాల్‌ ఆర్ట్స్‌ సంస్థ నిర్మిస్తున్న ఈ సినిమాకి సంగీతం: జీవీ ప్రకాష్‌ కుమార్‌, ఛాయాగ్రహణం: మధి, మాటలు: శ్రీకాంత్‌ విస్సా.