Keerthy Suresh: మహేశ్‌బాబుకు కీర్తిసురేశ్‌ క్షమాపణ.. కారణమిదే

ఇంటర్నెట్‌ డెస్క్‌: తాను చేసిన పొరపాటు కారణంగా మహేశ్‌బాబుకు సారీ చెప్పానని నటి కీర్తిసురేశ్‌ తెలిపింది. ఆ తప్పిదానికి మహేశ్‌ సీరియస్‌ అవలేదని, ఆ సందర్భంలో చాలా కూల్‌గా వ్యవహరించారని పేర్కొంది. ‘సర్కారువారి పాట’ చిత్రంలో ఈ ఇద్దరు నాయకానాయికలుగా నటించిన సంగతి తెలిసిందే. పరశురామ్‌ దర్శకత్వం వహించిన ఈ సినిమా మే 12న ప్రేక్షకుల ముందుకురానుంది. ఈ సందర్భంగా చిత్ర బృందం ప్రచారాన్ని వేగవంతం చేస్తోంది. ఇందులో భాగంగా కీర్తిసురేశ్‌ ఓ ఇంటర్వ్యూలో పాల్గొని మాట్లాడింది.

సారీ.. మూడోసారి

‘‘ఈ సినిమాలోని చివరి పాట చిత్రీకరణ సమయమది. నా వైపు నుంచి కో-ఆర్డినేషన్‌ మిస్సై, అనుకోకుండా మహేశ్‌ చెంపపై కొట్టా. వెంటనే ఆయన్ను క్షమాపణ అడిగా. ఇందులో ఏముందని మహేశ్‌ ఈ విషయాన్ని తేలికగా తీసుకున్నా నా మనసు కుదురుగా లేదు. మూడుసార్లు సారీ చెప్పేంత వరకూ ప్రశాంతంగా ఉండలేకపోయా’’ అని కీర్తిసురేశ్‌ వివరించింది. ‘‘దర్శకుడు పరశురామ్‌ ఈ సినిమా స్క్రిప్టు వినిపించగానే కొత్త అనుభూతికి లోనయ్యా. అంతగా నన్ను ఆకర్షించిందా కథ. పరశురామ్‌.. ఫిమేల్‌ పాత్రలను ఎంత చక్కగా తీర్చిదిద్దుతారో తెలుసు కాబట్టి ఈ చిత్రంలో నటించేందుకు అంగీకరించా. ఈ ప్రాజెక్టులో నేను పోషించిన కళావతి పాత్ర చాలా కొత్తగా ఉంటుంది’’ అని చెప్పింది. మేత్రీ మూవీ మేకర్స్‌, జీఎంబీ ఎంటర్‌టైన్‌మెంట్స్‌, 14 రీల్స్‌ ప్లస్‌ సంస్థలు సంయుక్తంగా నిర్మించిన ఈ చిత్రానికి తమన్‌ సంగీతం అందించారు. ఇందులోని పాటలు, సోమవారం విడుదలైన ట్రైలర్‌కు ప్రేక్షకుల నుంచి విశేష స్పందన లభించింది.