Krithi Shetty: ఆ దర్శకుడితో మాట్లాడుతూ ఏడ్చేశా: కృతిశెట్టి

ఇంటర్నెట్‌ డెస్క్‌: నటులెవరికైనా తాము పోషించిన పాత్రల్లో కొన్ని మనసుకు బాగా దగ్గరవుతాయి. ఒక్కోసారి అవి భావోద్వేగానికి గురిచేస్తుంటాయి. ‘బంగార్రాజు’ (Bangarraju) సినిమాలోని నాగలక్ష్మి పాత్ర తనకు ఇలాంటి అనుభూతినే పంచిందన్నారు హీరోయిన్‌ కృతిశెట్టి (Krithi Shetty). చిత్రీకరణ పూర్తైన తర్వాత ఆ సినిమాని చూసి, వెంటనే దర్శకుడు కల్యాణ్‌ కృష్ణకు ఫోన్‌ చేశానని, ఆయనతో మాట్లాడుతూ భావోద్వేగానికి గురై ఏడ్చానని చెప్పారు. తన తాజా చిత్రం ‘కస్టడీ’ (Custody) ప్రచారంలో భాగంగా పాల్గొన్న ఓ ఇంటర్వ్యూలో నాగలక్ష్మి క్యారెక్టర్‌ని కృతిశెట్టి గుర్తుచేసుకున్నారు. పూర్వీకులు రక్షణగా ఉంటారనే దాన్ని తాను నమ్ముతానని, సంబంధిత సన్నివేశాలు ‘బంగార్రాజు’లో ఉండడం వల్ల కనెక్ట్‌ అయ్యాయని వివరించారు. ఫెయిల్యూర్‌పై స్పందిస్తూ.. ప్రతి సినిమాకీ ఒకే విధంగా కష్టపడతానన్న ఆమె విజయం అనేది తన చేతుల్లో ఉండదన్నారు. నటి అనుష్కశెట్టిని కలవాలనుందనే మనసులో మాట బయటపెట్టారు. రాజకుమారి తరహా పాత్రల చేయాలనేది తన డ్రీమ్‌ అన్నారు.

అక్కినేని నాగార్జున (Akkineni Nagarjuna), ఆయన తనయుడు నాగచైతన్య (Naga Chaitanya) కలిసి నటించిన చిత్రమే ‘బంగార్రాజు’. అందులో చైత్యకు జోడీగా కృతి కనిపించారు. గతేడాది సంక్రాంతికి విడుదలైన ఈ సినిమా మంచి విజయం అందుకున్న సంగతి తెలిసిందే. ఈ హిట్‌ సినిమా తర్వాత చైతన్య, కృతి కలిసి ‘కస్టడీ’లో నటించారు. తమిళ దర్శకుడు వెంకట్‌ ప్రభు తెరకెక్కించిన ఈ సినిమా శుక్రవారం ప్రేక్షకుల ముందుకు వచ్చింది. ఈ యాక్షన్‌ ఎంటర్‌టైనర్‌ చిత్రంలో కానిస్టేబుల్‌ శివగా చైతన్య, రేవతిగా కృతి కనిపించారు. అరవిందస్వామి, శరత్‌కుమార్‌, ప్రియమణి కీలక పాత్రలు పోషించారు.