Adivi Sesh: ముంబయిలో ‘మేజర్‌’

‘మేజర్‌’తో (Major) హిందీలోనూ అభిమానుల్ని సొంతం చేసుకున్నారు కథానాయకుడు అడివి శేష్‌ (Adivi Sesh). 26/11 ఉగ్రవాద దాడుల్లో వీరమరణం పొందిన సందీప్‌ ఉన్నికృష్ణన్‌ జీవితం ఆధారంగా శశికిరణ్‌ తిక్కా ఈ చిత్రాన్ని తెరకెక్కించారు. ముంబయి దాడులు జరిగి నిన్నటితో సరిగ్గా పధ్నాలుగేళ్లు. ఈ సందర్భంగా మేజర్‌ సందీప్‌ పాత్ర పోషించిన అడివి శేష్‌ ఆదివారం ముంబయి వెళ్లి అమరవీరులకు నివాళి అర్పించారు. సందీప్‌ ఉన్నికృష్ణన్‌ తల్లిదండ్రులను మర్యాదపూర్వకంగా కలుసుకున్నారు. ‘ఈ ధీశాలులను కలుసుకోవడం, నివాళి అర్పించడం, ఆ వీరుల్ని కన్నవాళ్లని గౌరవించడం.. ఎన్నిసార్లు చేసినా.. ప్రతిసారీ నాకు గర్వంగానే ఉంటుంది. వాళ్ల త్యాగాన్ని ఈ దేశం ఎప్పటికీ మర్చిపోదు. వాళ్ల తల్లిదండ్రుల త్యాగం సైతం వెలకట్టలేనిది. సందీప్‌ పేరెంట్స్‌ని నా సొంత తల్లిదండ్రుల్లా భావిస్తుంటా. వాళ్లూ నన్ను కొడుకులాగే చూస్తారు’ అని ఈ సందర్భంగా ఒక ప్రకటనలో తెలిపారు అడివి శేష్‌. శేష్‌ నటించిన క్రైం డ్రామా ‘హిట్‌: ది సెకండ్‌ కేస్‌’ డిసెంబరు 2న విడుదలవుతోంది.