Adivisesh: రిలేషన్స్‌లో ఉన్నా.. పెళ్లి వరకూ తీసుకెళ్లే ధైర్యం రాలేదు : అడివి శేష్‌

ముద్దు సన్నివేశాలపై నటుడి అభిప్రాయమేంటంటే..?

హైదరాబాద్‌: సినిమా ఇండస్ట్రీలో గాడ్‌ఫాదర్‌ లేకుండా నటుడు కావాలనే ఆసక్తితో అమెరికా నుంచి వచ్చి స్వశక్తితో స్టార్‌ హీరోగా ఎదిగిన నటుడు అడివిశేష్‌ (Adivisesh). ఇండస్ట్రీలోకి అడుగుపెట్టిన సమయంలో సహాయనటుడు, విలన్‌ పాత్రలు పోషించిన ఆయన ‘క్షణం’తో (Kshanam) హీరోగా మారారు. ఆ సినిమా సక్సెస్‌తో ‘గూఢచారి’, ‘ఎవరు’ వంటి సస్పెన్స్‌ థ్రిల్లర్లలో నటించి మెప్పించారు. ఇటీవల ఆయన నటించిన ‘మేజర్‌’(Major) బాక్సాఫీస్‌ వద్ద పాజిటివ్‌ టాక్‌ సొంతం చేసుకుంది. ఈ నేపథ్యంలో తాజాగా శేష్‌ ఓ ఇంటర్వ్యూలో పాల్గొని ఆసక్తికర విశేషాలు పంచుకున్నారు.

‘‘నేను అమెరికాలోనే పెరిగినప్పటికీ చిన్నతనం నుంచి భారతదేశమంటే గౌరవం. దేశానికి సంబంధించి ఏ మాట విన్నా నాలో తెలియని అనుభూతి. సినిమాల్లో చేయాలని నిర్ణయించుకుని పరిశ్రమలోకి అడుగుపెట్టి చిన్న చిన్న రోల్స్‌ చేస్తున్న సమయంలో టాలీవుడ్‌కు చెందిన ఓ స్టార్‌ హీరో తనయుడ్ని చూశా. అతను అప్పటికింకా సినిమాల్లోకి కూడా రాలేదు. బాలనటుడిగా ఓ సినిమా మాత్రమే చేశాడు. అతనికున్న క్రేజ్‌ చూసి.. తప్పకుండా నాకంటూ ఓ బ్రాండ్‌ క్రియేట్‌ చేసుకోవాలని నిర్ణయించుకున్నా. ఇప్పటివరకూ నేను విభిన్నమైన పాత్రలు పోషించాను. నేను చేసే సినిమాల్లో డ్యూయెట్‌లు ఉండవు. ఎందుకంటే, నా డ్యాన్స్‌పై నాకే సందేహం. భవిష్యత్తులో ఓ పూర్తిస్థాయి ప్రేమకథా చిత్రంలో నటించాలని ఉంది. ఇక, ‘గూఢచారి’లో(Goodachari) మాత్రమే ముద్దు సన్నివేశాల్లో నటించాను. నా దృష్టిలో ఏదైనా సీన్‌ని కథ డిమాండ్‌ చేస్తేనే పెట్టాలి తప్ప.. కలెక్షన్ల కోసం మనం క్రియేట్‌ చేయకూడదు’’

‘‘యూఎస్‌లో నివసిస్తున్న ఓ పంజాబీ అమ్మాయిని ప్రేమించాను. కొన్ని కారణాలతో మా రిలేషన్‌ బ్రేకప్‌ అయ్యింది. అది కూడా నా పుట్టినరోజు నాడే ఆమె పెళ్లి చేసుకొని వెళ్లిపోయింది. ఆ తర్వాత రిలేషన్స్‌లో ఉన్నాను కానీ.. పెళ్లి వరకూ తీసుకెళ్లే ధైర్యం రాలేదు. ప్రస్తుతానికి నా దృష్టి మొత్తం సినిమాలపైనే. ఇక, పెళ్లి ఎప్పుడు చేసుకుంటావ్‌..? అని ఇంట్లోవాళ్లు అడిగి కాస్త విసిగిపోయారు. ప్రస్తుతం వాళ్లు మా చెల్లి పెళ్లి పనుల్లో బిజీగా ఉన్నారు’’ అని అడివిశేష్‌ వివరించారు.