Ajith: ఆ తమిళ సినిమాకు తెలుగు టైటిల్‌ ఇదే...!

హైదరాబాద్‌: కోలీవుడ్ లోనే కాదు టాలీవుడ్‌లోనూ మంచి ఫాలోయింగ్‌ ఉన్న నటుడు అజిత్(Ajith)‌. ఇటీవల వలిమై చిత్రంతో ప్రేక్షకులను పలకరించారు. ఈ సినిమా తమిళ, తెలుగు, కన్నడ, హిందీ భాషల్లో ఏకకాలంలో విడుదలైంది. అయితే ఈ సినిమాను తెలుగులోనూ అదే పేరుతో విడుదల చేయడం వల్ల ఈ భాషలో సరిగ్గా మెప్పించలేకపోయింది. తాజాగా తునివు(Thunivu) చిత్రంతో అలరించడానికి సిద్ధమయ్యారు. అయితే ఈ సినిమాను తెలుగులో అదే పేరుతో కాకుండా టైటిల్‌ మార్చి విడుదల చేయనున్నారట. తెలుగులో ఈ చిత్రాన్ని ‘తెగింపు’ పేరుతో రిలీజ్‌ చేయనున్నట్లు సమాచారం. రాధాకృష్ణ ఎంటర్‌టైన్‌మెంట్‌, ఐవీవై ప్రొడక్షన్స్ కలిసి రిలీజ్ చేస్తున్నట్లు తెలుస్తోంది. స్టైలిష్‌ యాక్షన్‌ ఎంటర్‌టైనర్‌గా హెచ్‌. వినోద్‌ దర్శకత్వంలో ఈ సినిమా తెరకెక్కుతోంది. మంజు వారియర్ కథానాయిక.  రానున్న సంక్రాంతి బరిలో వాల్తేరు వీరయ్య(Waltair Veerayya), వీర సింహా రెడ్డి(Veera Simha Reddy) సినిమాల సరసన ఈ చిత్రం విడుదలవ్వనుంది. ఇప్పటికే విజయ్‌ వారిసు సినిమా కూడా సంక్రాంతికే ప్రేక్షకుల ముందుకు రానుంది. ఈ సినిమాను ‘వారసుడు’ పేరుతో రిలీజ్‌ చేయనున్న విషయం తెలిసిందే.