Nagarjuna: ‘ది ఘోస్ట్‌’ తర్వాత 6 నెలలు విరామం తీసుకుంటా..: నాగార్జున

ఇంటర్నెట్‌ డెస్క్: టాలీవుడ్‌ అగ్రహీరోల్లో నాగార్జున ఒకరు. వయసుతో సంబంధం లేకుండా విభిన్న కథలతో ప్రేక్షకులను అలరిస్తుంటారు. తాజాగా బ్రహ్మాస్త్ర సినిమాలో కీలకపాత్రలో నటించారు. ప్రవీణ్‌ సత్తార్‌ దర్శకత్వంలో ఆయన నటించిన ‘ఘోస్ట్‌’ అక్టోబర్‌ 5న దసరా కానుకగా ప్రేక్షకుల ముందుకు రానుంది. ఈ సినిమా తర్వాత నాగార్జున 6 నెలలు సినిమాలకు బ్రేక్‌ తీసుకోనున్నారు. ఈ విషయాన్ని ఆయన ఓ ఆంగ్ల మీడియాకు ఇచ్చిన ఇంటర్వ్యూలో తెలిపారు.

‘‘కొవిడ్‌ తర్వాత పరిస్థితులు మారిపోయాయి. ప్రేక్షకుల అభిరుచుల్లో చాలా మార్పులు వచ్చాయి. ప్రజలు ఎలాంటి సినిమాలు కోరుకుంటున్నారో తెలుసుకోవాలనుకుంటున్నా. దీనికి 6 నెలల సమయం పట్టొచ్చు. ఈ సంవత్సరం ‘ఘోస్ట్‌’ తర్వాత నా సినిమాలేవీ విడుదలవ్వవు. ఇకపై నేను ఓటీటీ సినిమాల్లోనూ నటించాలనుకుంటున్నా. అందుకే ఏదైన కథ విన్న తర్వాత అది  ఓటీటీకి సరిపోతుందా.. థియేటర్‌లో రిలీజ్‌ చేయాలా.. అని ఆలోచించి నిర్ణయం తీసుకుంటాను’’ అని నాగార్జున చెప్పారు.