స్టార్‌ హీరోకి షాక్‌.. ప్రేక్షకుల్లేక షోలు రద్దు!

ముంబయి: బాలీవుడ్‌ స్టార్‌హీరో అక్షయ్‌కుమార్‌కు చేదు అనుభవం ఎదురైనట్లు తెలుస్తోంది. ప్రేక్షకులు లేకపోవడంతో ఆయన నటించిన కొత్త చిత్రం ‘సామ్రాట్‌ పృథ్వీరాజ్‌’ ప్రదర్శనలు నిలిచిపోయినట్లు పలు బాలీవుడ్‌ పత్రికల్లో కథనాలు వస్తున్నాయి. యశ్‌ రాజ్‌ ఫిల్మ్స్‌ పతాకంపై తెరకెక్కిన ఈ చిత్రానికి చంద్రప్రకాశ్‌ ద్వివేది దర్శకత్వం వహించారు. చక్రవర్తి పృథ్వీరాజ్‌ చౌహాన్‌ జీవితాన్ని ఆధారంగా చేసుకుని ఈ సినిమా రూపుదిద్దుకుంది. ఇప్పటి తరం ప్రేక్షకులను ఆకర్షించే విధంగా భారీ వీఎఫ్‌ఎక్స్‌ ఎఫెక్ట్స్‌తో సుమారు రూ.300 కోట్ల బడ్జెట్‌ పెట్టి ఈ చిత్రాన్ని నిర్మించారు. ఎన్నో అంచనాల మధ్య ఈ సినిమా జూన్‌ 3న ప్రేక్షకుల ముందుకు వచ్చింది. విడుదలైన నాటి నుంచి ఈ చిత్రానికి అనుకున్నంత స్థాయిలో గుర్తింపు రాలేదు. దీంతో ఇప్పటివరకూ ఈ సినిమా కేవలం రూ.55 కోట్లు మాత్రమే వసూళ్లు రాబట్టినట్లు సినీ విశ్లేషకులు అంచనా వేస్తున్నారు. ఈ క్రమంలో సినిమా చూడటానికి ఒక్కరు కూడా రాకపోవడంతో చాలా థియేటర్లలో ప్రదర్శనలు రద్దు చేశారట. కొన్నిచోట్ల థియేటర్లలో ఎక్కువ భాగం సీట్లు ఖాళీగా ఉండటంతో ప్రదర్శనలు నిలిపివేశారని బాలీవుడ్‌లో వార్తలు చక్కర్లు కొడుతున్నాయి.