Allu Aravind: నేటితో సమస్యలకు ఎండ్‌ కార్డ్‌: అల్లు అరవింద్‌

సినీ పెద్దల భేటీపై అరవింద్‌ ఏమన్నారంటే

హైదరాబాద్‌: ఆంధ్రప్రదేశ్‌ సినిమా టికెట్‌ ధరల వ్యవహారానికి నేటితో ఫుల్‌స్టాప్‌ పడే అవకాశం ఉందని ప్రముఖ నిర్మాత అల్లు అరవింద్‌ అన్నారు. ఈ వ్యవహరంపై ఏపీ ముఖ్యమంత్రి జగన్‌తో గురువారం ఉదయం చిరంజీవి, నాగార్జునతోపాటు పలువురు ఇండస్ట్రీ పెద్దలు సమావేశం కానున్న విషయం తెలిసిందే. ప్రస్తుతం ఇండస్ట్రీ చూపు మొత్తం ఈ భేటీపైనే ఉంది. సినీ పరిశ్రమకు సంబంధించిన పలు సమస్యలకు నేటితో ముగింపు పడొచ్చని అందరూ ఆశిస్తున్నారు. ఈ నేపథ్యంలో తాజాగా అల్లు అరవింద్‌ మాట్లాడుతూ.. ‘‘సినీ పరిశ్రమకు సంబంధించిన అన్ని సమస్యలకు నేటితో ఎండ్‌ కార్డ్‌ పడుతుందని ఆశిస్తున్నాం. ఇండస్ట్రీకి మేలు జరిగేలా ప్రకటన వస్తుందని భావిస్తున్నా. మా కుటుంబం నుంచి చిరంజీవి వెళ్లారు. కాబట్టి నేను వెళ్లాల్సిన అవసరం లేదు’’ అని ఆయన అన్నారు.