Pushpa2: విశాఖకు ‘పుష్ప’

కథానాయకులు కొన్ని కొన్ని పాత్రలతో సుదీర్ఘ ప్రయాణం చేస్తుంటారు. అల్లు అర్జున్‌ (Allu Arjun) కూడా పుష్పరాజ్‌ పాత్రతో అలాంటి ప్రయాణాన్నే కొనసాగిస్తున్నారు. ‘పుష్ప: ది రైజ్‌’ తర్వాత ఆయన మరో సినిమా చేయలేదు. నేరుగా కొనసాగింపు చిత్రం ‘పుష్ప: ది రూల్‌’ (Pushpa 2) సెట్లోకే అడుగుపెట్టారు. సుకుమార్‌ దర్శకత్వం వహిస్తున్న ఈ సినిమా చిత్రీకరణ క్రమంగా ఊపందుకొంటోంది. ఇటీవలే కొన్ని రోజులుగా హైదరాబాద్‌లో కీలక సన్నివేశాల్ని తెరకెక్కించారు. ఈ వారంలో విశాఖపట్నంలో చిత్రీకరణ జరపనున్నారు. అందుకోసం గురువారమే అల్లు అర్జున్‌ విశాఖపట్నం చేరుకోనున్నట్టు ఆయన సన్నిహిత వర్గాలు తెలిపాయి. పది రోజులకిపైగా అక్కడ చిత్రీకరణ జరపున్నట్టు తెలిసింది. కథానాయికగా నటిస్తున్న రష్మిక (Rashmika) వచ్చే నెలలో ఈ సినిమా సెట్లోకి అడుగు పెడుతున్నట్టు తెలిపారు. ‘పుష్ప: ది రైజ్‌’కి అంతర్జాతీయ స్థాయిలో ఆదరణ లభించింది. అది దృష్టిలో ఉంచుకుని కొనసాగింపు చిత్రాన్ని అంతర్జాతీయ ప్రమాణాలతో రూపొందిస్తున్నారు. కథ కూడా విదేశీ నేపథ్యాన్ని ఆవిష్కరించనున్నట్టు తెలుస్తోంది. మైత్రీ మూవీ మేకర్స్‌ పతాకంపై నవీన్‌ యెర్నేని, వై.రవిశంకర్‌ ఈ చిత్రాన్ని నిర్మిస్తున్నారు.