Allu arjun: షారుక్‌ ‘జవాన్‌’లో అల్లు అర్జున్‌.. డైరెక్టర్‌ అట్లీ అదిరిపోయే ప్లాన్‌..!

హైదరాబాద్‌: ప్రస్తుతం షారుక్‌ ఖాన్‌ (Shahrukh Khan) ‘పఠాన్‌’ సినిమా అందించిన విజయాన్ని సెలబ్రెట్‌ చేసుకుంటున్నాడు. ఈ చిత్రం తన కెరీర్‌లోనే మంచి వసూళ్లు సాధించిన సినిమాల జాబితాలో చేరింది. ఈ జోష్‌తోనే షారుక్‌ తన తర్వాత సినిమా మొదలుపెట్టేశాడు. అట్లీ (Atlee) దర్శకత్వంలో రానున్న  ‘జవాన్‌’ (Jawan) సినిమా షూటింగ్‌లో పాల్గొంటున్నాడు. ఇప్పటికే ఈ సినిమాలోని తారాగణాన్ని ప్రకటించి సినీప్రియుల్లో ఆసక్తి పెంచేసింది చిత్రబృందం. తాజాగా ఈ సినిమాకు సంబంధించిన ఓ వార్త నెట్టింట చక్కర్లు కొడుతూ.. ఇటు టాలీవుడ్‌ అటు బాలీవుడ్‌ రెండు చోట్లా టాక్‌ ఆఫ్‌ ది ఇండస్ట్రీగా మారింది.

షారుక్‌ సరసన లేడీ సూపర్‌ స్టార్‌ నయనతార నటిస్తోన్న ఈ సినిమాలో ఐకాన్‌ స్టార్‌ అల్లు అర్జున్‌ (Allu Arjun) నటించనున్నారనే టాక్‌ వినిపిస్తోంది. ‘జవాన్‌’లో అతిథి పాత్ర కోసం బన్నీని చిత్రబృందం సంప్రదించిందనే వార్త సోషల్‌ మీడియాలో హల్‌చల్‌ చేస్తోంది. ఒకవేళ బన్నీ ఈ ప్రాజెక్ట్‌లో నటించేందుకు అంగీకరిస్తే బీటౌన్‌తో పాటు ఇటు తెలుగులోనూ సినిమా హిట్‌ అవుతుందని అట్లీ భావిస్తున్నట్లు సమాచారం. అయితే ఈ విషయంపై అధికారిక ప్రకటన రాలేదు కానీ వార్త మాత్రం వైరల్‌ అవుతోంది. ప్రస్తుతం అల్లుఅర్జున్‌ ‘పుష్ప2’ (Pushpa The Rule) సినిమా షూటింగ్‌లో బిజీగా ఉన్నాడు. ఇటీవలే వైజాగ్‌లో ఈ సినిమాలోని కొన్ని కీలక సన్నివేశాలు చిత్రీకరించారు. త్వరలోనే ఈ షూటింగ్‌లో నేషనల్‌ క్రష్‌ రష్మిక (Rashmika) పాల్గొననుంది.