Allu Arjun: ప్రేమతో ఇరవై ఏళ్లు

అల్లు అర్జున్‌ (Allu Arjun) కథానాయకుడిగా రెండు దశాబ్దాల ప్రయాణాన్ని పూర్తి చేసుకున్నారు. ఆయన తొలి చిత్రం ‘గంగోత్రి’ ప్రేక్షకుల ముందుకొచ్చి మంగళవారంతో ఇరవయ్యేళ్లు పూర్తయ్యాయి. ఈ సందర్భంగా తన ప్రయాణాన్ని గుర్తు చేసుకుంటూ ట్వీట్‌ చేశారు.  ‘‘చిత్ర పరిశ్రమలో ఇరవయ్యేళ్లు పూర్తయ్యాయి. నన్నంతా ప్రేమలో ముంచెత్తారు. ప్రేక్షకులు, అభిమానుల ప్రేమే ఈ ప్రయాణానికి కారణం. పరిశ్రమకీ, నన్ను ఆరాధించేవాళ్లకి ఎప్పటికీ కృతజ్ఞుడిని’’ అంటూ ట్వీట్‌ చేశారు అల్లు అర్జున్‌. ప్రస్తుతం ఆయన సుకుమార్‌ దర్శకత్వంలో ‘పుష్ప: ది రూల్‌’ చిత్రంలో నటిస్తున్నారు. ఈ సందర్భంగా సుకుమార్‌ సామాజిక మాధ్యమాల్లో ఓ ఫోటోని పంచుకుంటూ... ‘‘అల్లు అర్జున్‌ నుంచి స్టైలిష్‌ స్టార్‌గానూ, ఇప్పుడు ఐకాన్‌ స్టార్‌గాను ఎదిగారు నా ప్రియమైన బన్నీ. 20 అద్భుతమైన సంవత్సరాలు. అందులో నేను భాగం కావడం సంతోషంగా ఉంది’’ అంటూ ఆయన వ్యాఖ్య చేశారు.