Allu arjun: ఫొటో షూట్‌ రద్దు చేసిన బన్నీ.. స్టేజ్‌ పైనే కన్నీళ్లు పెట్టుకున్న అభిమానులు

హైదరాబాద్‌: ప్రతి సినిమాతో తన ప్రత్యేకతను చాటుకుంటూ ఐకాన్‌ స్టార్‌గా ఎదిగారు అల్లు అర్జున్(Allu Arjun)‌. ‘పుష్ప’(Pushpa) సినిమాతో పాన్‌ ఇండియా యాక్టర్‌గా గుర్తింపు తెచ్చుకున్నారు. ఇక ఈ పుష్పరాజ్‌ ఫ్యాన్‌ ఫాలోయింగ్‌ గురించి ప్రత్యేకంగా చెప్పే పనిలేదు. బన్నీ ఎక్కడికి వస్తే అక్కడికి చేరుకుంటారు ఆయన అభిమానులు. ఈ హీరో నటిస్తోన్న ‘పుష్ప2’ (Pushpa 2 The Rule) సినిమా షూటింగ్‌ వైజాగ్‌లో జరుగుతోన్న విషయం తెలిసిందే. ఈ షూటింగ్‌ గ్యాప్‌లో బన్నీ అభిమానులతో కలిసి ఫొటోషూట్‌ ఏర్పాటు చేశారు. ఆయన్ని చూసేందుకు భారీ సంఖ్యలో అభిమానులు అక్కడికి చేరుకున్నారు. అయితే కొందరి అత్యుత్సాహం వల్ల ఆ కార్యక్రమంలో గందరగోళం నెలకొంది. దీంతో చేసేదేమీ లేక ఫొటో షూట్‌ రద్దు చేశారు.

బన్నీతో ఫొటో దిగేందుకు వచ్చిన అభిమానులు నిరాశతో వెనుదిరిగారు. కొందరు ఏకంగా స్టేజ్‌పైనే కన్నీళ్లు పెట్టుకున్నారు. దీనికి సంబంధించిన వీడియోలు నెట్టింట వైరల్‌ అవుతున్నాయి. ప్రస్తుతం అల్లుఅర్జున్‌ ‘పుష్ప2’ సినిమా షూటింగ్‌లో బిజీగా ఉన్నారు. ఈ చిత్రం కోసం సినీ ప్రియులతో పాటు పాన్‌ ఇండియా ట్రేడ్‌ వర్గాలు కూడా ఆసక్తిగా ఎదరు చేస్తున్నాయి. సుకుమార్‌(Sukumar) దర్శకత్వంలో రూపొందుతున్న ఈ సినిమా మొదటి భాగంలో ఫహాద్‌ ఫాజిల్‌ (Fahad Fazil)విలన్‌గా కనిపించారు. ఇక రెండో భాగంలో ఆయనతో పాటు విజయ్‌ సేతుపతి(Vijay Sethupathi) కూడా కనిపించనున్నట్లు సమాచారం.