Amitabh Bachchan: అందుకే అభిమానుల్ని కలిసినప్పుడు చెప్పులు తీసేస్తాను..: బిగ్‌బీ

హైదరాబాద్‌: వయసుతో సంబంధం లేకుండా నేటితరం నటులతో పోటీపడి నటిస్తుంటారు అమితాబ్‌ బచ్చన్‌(Amitabh Bachchan). ఆయనకు అభిమానులంటే ఎంత ఇష్టమో పలు సందర్భాల్లో బహిరంగంగా చెప్పారు. ఎలాంటి విషయంలో అయినా ఆయన అభిమానుల గురించి స్పందించే తీరు ఎంతో మంది నటులకు ఆదర్శం. సోషల్‌ మీడియాల్లో ఎప్పుడూ చురుగ్గా ఉండే బిగ్‌బీ తన అభిమానుల కోసం ‘జల్సా’ అనే కార్యక్రమం ఏర్పాటు చేసిన సంగతి తెలిసిందే. ఈ కార్యక్రమం ద్వారా ప్రతి ఆదివారం ఆయన అభిమానులను నేరుగా కలిసి వాళ్లతో కొంత సమయం గడుపుతారు. కొవిడ్‌ కారణంగా ఈ కార్యక్రమాన్ని కొన్నాళ్లు ఆపేశారు. తిరిగి రెండు సంవత్సరాల తర్వాత దానిని ప్రారంభించారు. అయితే, అమితాబ్‌ అభిమానుల దగ్గరకు వెళ్లినప్పుడు చెప్పులు ఎందుకు తీసేస్తారో తాజాగా ఆయన బ్లాగ్‌లో తెలిపారు.

‘‘నేను ఎప్పుడు ‘జల్సా’ కార్యక్రమంలో అభిమానుల్ని కలిసినా చెప్పులు తీసేస్తాను. అభిమానులు నాకు దైవంతో సమానం. వాళ్లంటే నాకు భక్తి. ప్రతి ఆదివారం జరిగే జల్సాను  నేను ఓ ఆధ్యాత్మిక కార్యక్రమంగా భావిస్తాను. నన్ను ఫోన్‌లో ఫొటోలు తీసుకుని వారు ఆనందిస్తుంటే నాకు చాలా సంతోషంగా ఉంటుంది’’ అని తన బ్లాగ్‌లో వెల్లడించారు బిగ్‌బీ. ఇది చదివిన అభిమానులు మీరు నిజమైన హీరో అంటూ అమితాబ్‌ను ప్రశంసిస్తున్నారు.