Anasuya: ‘గాడ్‌ఫాదర్‌’.. అందుకే దూరంగా ఉన్నా: అనసూయ

హైదరాబాద్‌: అగ్ర కథానాయకుడు, మెగాస్టార్‌ చిరంజీవి (Chiranjeevi) ప్రధాన పాత్రలో నటించిన చిత్రం ‘గాడ్‌ఫాదర్‌’ (Godfather). పొలిటికల్‌ థ్రిల్లర్‌గా రూపుదిద్దుకున్న ఈ సినిమాలో యాంకర్‌ అనసూయ ఓ కీలక పాత్ర పోషించారు. న్యూస్‌ ఛానెల్‌ రిపోర్టర్‌గా ఆమె స్క్రీన్‌పై కనిపించిన కొన్ని క్షణాలు ప్రేక్షకులను ఆకట్టుకున్నాయి. దీంతో అనసూయ యాక్టింగ్‌ని మెచ్చుకుంటూ పలువురు నెటిజన్లు ట్వీట్స్‌ చేస్తున్నారు. ఈ క్రమంలోనే ఓ నెటిజన్‌.. ‘‘గాడ్‌ఫాదర్‌’లో మీ రోల్‌ నాకెంతో నచ్చింది. సినిమాలో ఇంత మంచి రోల్‌ చేసినప్పటికీ మీరెందుకు ప్రమోషన్స్‌లో ఎక్కడా కనిపించలేదు’’ అని ట్వీట్‌ చేశాడు. దానిపై అనసూయ స్పందించారు. ‘‘మీరు నమ్మాలి.. చాలా షూట్స్‌ ఒకేసారి జరుగుతున్నాయి. మిమ్మల్ని ఎంటర్‌టైన్‌ చేయడానికి నేను ఎంతో కష్టపడుతున్నా’’ అంటూ తాను వరుస షూట్స్‌తో బిజీగా ఉన్న విషయం తెలిపారు. ఇక అనసూయ ఇటు సినిమాలు, అటు షోలు చేస్తూ ప్రేక్షకుల్ని అలరిస్తోన్న విషయం తెలిసిందే.

మలయాళంలో సూపర్‌హిట్‌ అందుకున్న ‘లూసిఫర్‌’కు రీమేక్‌ ‘గాడ్‌ఫాదర్‌’ సిద్ధమైంది. మోహన్‌రాజా దర్శకుడు. మాతృకతో సంబంధం లేకుండా తెలుగు ప్రేక్షకులకు తగినట్లు పలు మార్పులు చేసి ‘గాడ్‌ఫాదర్‌’ను తెరకెక్కించారు. ఇందులో చిరు బ్రహ్మాగా నటించారు. ప్రతినాయకుడిగా సత్యదేవ్‌ మెప్పించారు. నయనతార, సల్మాన్‌ఖాన్‌, పూరీ జగన్నాథ్‌, సునీల్‌, గెటప్‌ శ్రీను.. ఇలా ఎంతోమంది స్టార్స్‌ ఈ సినిమాలో ముఖ్య భూమిక పోషించారు. దసరా కానుకగా విడుదలైన ఈ సినిమా బాక్సాఫీస్‌ వద్ద హిట్‌ అందుకుంది. చిరు అదరగొట్టేశారని మెగా అభిమానులు మెచ్చుకుంటున్నారు.