Anasuya: ప్రెస్‌మీట్‌లో కన్నీరు పెట్టుకున్న అనసూయ

హైదరాబాద్‌: బుల్లితెర వ్యాఖ్యాత, నటి అనసూయ (Anasuya) భావోద్వేగానికి గురయ్యారు. మంగళవారం జరిగిన ‘రంగమార్తాండ’ (Rangamarthanda) ప్రెస్‌మీట్‌లో ఆమె కన్నీరు పెట్టుకున్నారు. సినిమా ఫైనల్‌ కాపీ చూసి తనకి కన్నీళ్లు వచ్చేశాయని అన్నారు. ‘‘సినిమా ప్రమోషన్స్‌ విషయంలో కంగారు పడి తరచూ మా దర్శకుడు కృష్ణవంశీకి కాల్‌ చేసేదాన్ని. సర్‌.. ప్రమోషన్స్‌ ఇంకా మొదలుపెట్టలేదు ఎలా? అని ఆయన్ని అడగ్గా  ‘మన సినిమా మాట్లాడుతుంది’ అని సమాధానం ఇచ్చేవారు. ఈ క్షణం చాలా ఎమోషనల్‌గా ఉంది. ‘రంగమార్తాండ’ వంటి గొప్ప సినిమాలో భాగం అయ్యాను. నా జీవితానికి ఇది చాలు. సోమవారం సాయంత్రం ఈ సినిమా చూశాను. అక్కడే ఆగిపోయాను. సినిమాలో నటించాను కదా.. దీన్ని అంత ఎమోషనల్‌ కానులే అనుకుని ధైర్యం, పొగరుగా వెళ్లి షోలో కూర్చొన్నాను. ఉన్నట్టుండి కన్నీరు ఆగలేదు. ప్రతి ఒక్కరూ తప్పకుండా చూడాల్సిన చిత్రమిది’’ అని ఆమె అన్నారు.

సుమారు నాలుగేళ్ల విరామం తర్వాత కృష్ణవంశీ (Krishna Vamsi) నుంచి వస్తోన్న చిత్రమిది. మరాఠీలో మంచి విజయాన్ని అందుకున్న ‘నటసామ్రాట్‌’కు రీమేక్‌గా ఇది తెరకెక్కింది. అంతరించుపోతోన్న నాటకరంగం, దానివల్ల రంగస్థల నటుడు ఎలాంటి ఇబ్బందులు ఎదుర్కొన్నాడు? అనే అంశంతో ఇది రూపుదిద్దుకుంది. ప్రకాశ్‌రాజ్‌, బ్రహ్మానందం, రమ్యకృష్ణ కీలకపాత్రలు పోషించగా.. శివాత్మిక, రాహుల్‌ సిప్లిగంజ్‌, అనసూయ, అలీ రెజా వంటి వారు ముఖ్య భూమికల్లో నటించారు. ఉగాది కానుకగా బుధవారం ఈ సినిమా ప్రేక్షకుల ముందుకు వచ్చింది.