పోటీకి సిద్ధమైన సందీప్‌రెడ్డి వంగా

హైదరాబాద్‌: లాక్‌డౌన్‌ కారణంగా గతేడాది ఎన్నో సినిమాలు విడుదలకు నోచుకోకపోవడంతో ఈ ఏడాది బాక్సాఫీస్‌ వద్ద రిలీజ్‌లు వరస కట్టాయి. దీంతో టాలీవుడ్‌, బాలీవుడ్‌ ప్రాజెక్ట్‌లు రిలీజ్‌ తేదీలను ప్రకటిస్తున్నాయి. ఈ క్రమంలోనే తాజాగా దర్శకుడు సందీప్‌రెడ్డి వంగా సైతం తన తదుపరి చిత్రం ‘యానిమల్‌’ రిలీజ్‌ డేట్‌ను ప్రకటించారు. ‘కబీర్‌ సింగ్‌’తో మొదటి ప్రయత్నంలోనే బాలీవుడ్‌లో పేరు పొందిన సందీప్‌రెడ్డి.. రణ్‌బీర్‌ కపూర్‌ కథానాయకుడిగా ‘యానిమల్‌’ ప్రాజెక్ట్‌ తెరకెక్కించనున్నారు. పరిణీతి చోప్రా కథానాయిక. అనిల్‌కపూర్‌ కీలకపాత్రలో కనిపించనున్నారు. త్వరలో పట్టాలెక్కనున్న ఈ చిత్రాన్ని వచ్చే ఏడాది దసరా కానుకగా విడుదల చేయనున్నట్లు దర్శకుడు సందీప్‌రెడ్డి వంగా ప్రకటించారు. భూషణ్‌కుమార్‌, కృష్ణ కుమార్‌ ఈ చిత్రాన్ని నిర్మిస్తున్నారు.