Anu Emmanuel: శిరీష్‌తో డేటింగ్‌ వార్తలు.. అమ్మ బాధపడింది: అను ఇమ్మాన్యుయేల్‌

హైదరాబాద్‌: అల్లు శిరీష్‌ (Allu Sirish)తో తాను డేటింగ్‌లో ఉన్నానంటూ వస్తోన్న వార్తలపై నటి అను ఇమ్మాన్యుయేల్‌ (Anu Emmanuel) స్పందించారు. అందులో ఎలాంటి నిజం లేదన్నారు. నటీనటులపై ఇలాంటి వార్తలు రావడం సర్వసాధారణమని, అసత్య ప్రచారాలను తాను పట్టించుకోనని అన్నారు. అయితే, ఈ వార్తలు చదివి తన తల్లి బాధపడిందని చెప్పారు.

వీరిద్దరూ జంటగా నటించిన రీసెంట్‌ యూత్‌ఫుల్‌ ఎంటర్‌టైనర్‌ ‘ఊర్వశివో రాక్షసివో’. రాకేశ్‌ శశి దర్శకత్వం వహించిన ఈ సినిమా శుక్రవారం ప్రేక్షకుల ముందుకు వచ్చింది. ప్రేమ, డేటింగ్‌ నేపథ్యంలో రూపుదిద్దుకున్న ఈ సినిమాలో అను-శిరీష్‌పై ప్రేమ సన్నివేశాలు ఎక్కువగా చిత్రీకరించారు. దీంతో ఈ సినిమా ప్రచార చిత్రాలు విడుదలైన నాటి నుంచి.. వీరిద్దరూ ప్రేమలో ఉన్నారంటూ వరుస వార్తలు నెట్టింట చక్కర్లు కొట్టాయి.