Anupama: చిన్న ప్రయత్నాలు... పెద్ద ఆనందాలు

‘‘ఒక్కోసారి చిన్న ప్రయత్నాలైనా... పెద్ద ఆనందాలను ఇస్తాయి. గొప్ప అనుభూతులను తెస్తాయి’’ అంటోంది కేరళ కుట్టి... అనుపమ పరమేశ్వరన్‌. ఇటీవల ఈమె ‘ఫ్రీడమ్‌@మిడ్‌నైట్‌’ అనే 29 నిమిషాల నిడివున్న షార్ట్‌ ఫిల్మ్‌లో నటించింది. 6వ ఇండియన్‌ వరల్డ్‌ ఫిల్మ్‌ ఫెస్టివల్‌లో ఇందులో నటనకు గాను అనుపమకు ఉత్తమ నటిగా బహుమతి అందింది. ఈ సందర్భంగా ఆమె మాట్లాడుతూ ‘‘భర్త చేస్తున్న మోసాన్ని  తెలుసుకున్న ఓ మధ్యతరగతి ఇల్లాలు పాత్ర అది. చాలా మంది గృహిణిల మనసును ఆవిష్కరించిన చిత్రమిది. మా చిన్న ప్రయత్నానికి పెద్ద బహుమతి దక్కింది’’ అని పేర్కొంది. దీనికి ఆర్‌.జె.షాన్‌ దర్శకత్వం వహించారు. యూట్యూబ్‌లో ఈ చిత్రాన్ని తెలుగులోనూ విడుదల చేశారు. కోటికిపైగా వీక్షణలతో ప్రేక్షకాదరణ పొందింది. ప్రస్తుతం అనుపమ ‘18పేజెస్‌’, ‘కార్తికేయ-2’ చిత్రాల్లో నటిస్తోంది. ఇవి రెండూ విడుదలకు సిద్ధంగా ఉన్నాయి.