Anushka Sharma: విరుష్క జోడీ డిన్నర్‌ సాయంత్రమే.. ఆ హీరోయిన్‌ ఇంటికి వెళ్లినా అంతేనట!

ఇంటర్నెట్‌ డెస్క్‌: ‘సాయంత్రం 6- 7 గంటల మధ్య భోజనం చేయాలి.. వీలైనంత త్వరగా పడుకోవాలి.. అప్పుడే ఆరోగ్యం బాగుంటుంది’ అని వైద్యులు చెప్పే మాటలు తరచూ వింటుంటాం. వాటిని కొందరు విని, వదిలేస్తే.. కొందరు మాత్రం ఆ పద్ధతిని తప్పకుండా పాటిస్తుంటారు. ఈ రెండో జాబితాలోకే వస్తారు అనుష్కశర్మ (Anushka Sharma)- విరాట్‌ కోహ్లీ (Virat Kohli). ఈ దంపతులు తాము ఎంతటి బిజీలో ఉన్నా సాయంత్రం 6 అవగానే భోజనం చేసేస్తారట. ఇటీవల ఓ ఇంటర్వ్యూలో పాల్గొన్న అనుష్క తమ వ్యక్తిగత జీవిత విశేషాలు పంచుకున్నారు.

6కే డిన్నర్‌ చేస్తామన్న అనుష్క రాత్రి 9:30 గం.లకే నిద్రపోతామని తెలిపారు. ‘ఇంట్లో ఉన్నప్పుడు ఓకే. మరి, వేరే ప్రాంతానికో, ఈవెంట్‌కో వెళ్తే ఎలా?’ అనే సందేహంరావడం సహజం. ఇలాంటి ప్రశ్నలకూ ఆమె సమాధానమిచ్చారు. ‘‘కత్రినా కైఫ్‌, విక్కీకౌశల్‌ దంపతులు మమ్మల్ని ఓ రోజు తమ ఇంటికి ఆహ్వానించారు. ఉన్న విషయాన్ని వారికి చెప్పాం. మేం 7- 7:30 గం.ల మధ్య డిన్నర్‌ చేస్తాం.. త్వరగా వెళ్లిపోతాం అని వివరించగానే అందుకు కత్రినా అంగీకరించింది’’ అని అనుష్క తెలిపారు.

విరుష్క జోడీ ఫిట్‌నెస్‌కు అధిక ప్రాధాన్యత ఇస్తుందనే విషయం తెలిసిందే. తమ వ్యాయామానికి సంబంధించిన వీడియోలు సోషల్‌ మీడియా వేదికగా పంచుకుంటూ ఈ జంట అభిమానుల్లో స్ఫూర్తినింపుతుంటుంది. చివరిగా 2018లో ‘జీరో’ సినిమాలో కథానాయికగా మెరిసిన అనుష్క త్వరలోనే మళ్లీ ప్రేక్షకులను పలకరించనుంది. ఆమె తాజా చిత్రం ‘చక్‌దా ఎక్స్‌ప్రెస్‌’ త్వరలోనే విడుదలకానుంది. ప్రముఖ మహిళా క్రికెటర్‌ జులన్‌ గోస్వామి జీవిత కథతో రూపొందిన చిత్రమది.