Anushka: భూతకోల ప్రదర్శనను తిలకించిన అనుష్క.. వీడియో వైరల్‌

మంగళూరు: చాలా రోజుల తర్వాత అగ్ర కథానాయిక అనుష్క వార్తల్లోకి వచ్చారు. గత కొంతకాలంగా ఎక్కడ చూసినా కాంతార ప్రభావమే కనిపించిన సంగతి తెలిసిందే. ‘వరాహరూపం’ పాట ఇప్పటికీ యూట్యూబ్‌లో ట్రెండ్‌ అవుతోంది. ఈ క్రమంలో అగ్ర కథానాయిక అనుష్క భూతకోల ప్రదర్శన వీక్షించారు. మంగళూరులో నిర్వహించిన భూతకోలను కుటుంబ సభ్యులతో కలిసి వీక్షించారు. ఇందుకు సంబంధించిన వీడియో సామాజిక మాధ్యమాల్లో వైరల్‌ అవుతోంది. భూతకోల ప్రదర్శనను ఆమె వీడియో తీస్తూ కనిపించారు.

ఇక సినిమాల విషయానికి వస్తే, ‘నిశ్శబ్దం’ తర్వాత అనుష్క సినిమాలు తగ్గించేశారు. యూవీ క్రియేషన్స్‌ బ్యానర్లో నవీన్‌ పొలిశెట్టితో కలిసి ఓ సినిమా చేస్తున్నారు. మహేశ్‌ దర్శకుడు. ఇందులో అనుష్క షెఫ్‌గా కనిపించనున్నారు. ఈ సినిమా గురించి కూడా పెద్దగా అప్‌డేట్‌లు లేవు. ఈ క్రమంలో ఇటీవల అనుష్క పుట్టినరోజు సందర్భంగా కొత్త సినిమాకు సంబంధించిన లుక్‌ను చిత్ర బృందం పంచుకుంది. గత కొన్ని రోజులుగా వెండితెరపై అనుష్కను చూద్దామనుకుంటున్న అభిమానులకు నిరాశే ఎదురవుతోంది. వచ్చే ఏడాది అయినా అనుష్క సినిమా వస్తుందని ఆమె అభిమానులు ఆశగా ఎదురు చూస్తున్నారు.