Colour Photo: సుహాస్‌, చాందిని డ్యాన్స్ క‌ష్టం చూశారా!  

ఇంట‌ర్నెట్ డెస్క్‌:  తెరపై బొమ్మని చూస్తున్న‌ప్పుడు ప్రేక్ష‌కులు ఎంత ఆనందిస్తారో.. తెర వెన‌క జ‌రిగిన విష‌యాలు తెలుసుకునేందుకు అంతే ఆస‌క్తి క‌న‌బ‌రుస్తారు. అందుకే ఆయా చిత్ర బృందాలు కీల‌క సన్నివేశాలు, పాట‌ల‌కు సంబంధించిన మేకింగ్ వీడియోలు పంచుకుంటాయి. తాజాగా ‘క‌ల‌ర్ ఫోటో’ చిత్రంలోని ఓ సాంగ్ మేకింగ్ వీడియో విడుద‌లైంది. సుహాస్‌, చాందిని చౌద‌రి జంట‌గా న‌టించిన చిత్ర‌మే ‘క‌ల‌ర్ ఫోటో’. సందీప్ రాజ్ ద‌ర్శ‌కుడు. గ‌తేడాది ఓటీటీ ఆహాలో విడుద‌లై విశేష ప్రేక్ష‌కాద‌ర‌ణ పొందింది ఈ ప్రేమ క‌థా చిత్రం. ఇందులోని పాట‌ల‌కూ మంచి ఆద‌ర‌ణ ల‌భించింది. ఆ జాబితాలో నిలిచిన అరెరె ఆకాశంలోన అనే గీతాన్ని తెర‌పైకి ఎలా తీసుకొచ్చారో తెలియ‌జేసే ప్ర‌య‌త్నం చేసింది ఆహా సంస్థ‌. సామాజిక మాధ్య‌మాల వేదిక‌గా మేకింగ్ వీడియోను విడుద‌ల చేసింది. ఇందులో ఈ హుషారైన గీతానికి స్టెప్పులు ఎలా వేయాలో నాయకానాయిక‌ల‌కు చూపిస్తారు ద‌ర్శ‌కుడు. ఇంకెందుకు ఆల‌స్యం మీరూ చూసి ఆనందించండి...