Arjun Kapoor: మలైకపై వార్తలు.. అర్జున్‌ కపూర్ వార్నింగ్‌

ముంబయి: తన ప్రియురాలు మలైకా అరోరా (Malaika Arora) తల్లి కానుందంటూ ఓ ఆంగ్ల వెబ్‌సైట్‌ ప్రచురించిన కథనంపై బాలీవుడ్‌ నటుడు అర్జున్‌ కపూర్‌ (Arjun Kapoor) తీవ్ర ఆగ్రహం వ్యక్తం చేశారు. సదరు ఆర్టికల్‌ స్క్రీన్‌ షాట్‌ షేర్‌ చేసిన ఆయన.. ‘‘మీరు సాధారణమైన విషయంగా భావించి రాసే ఇలాంటి పనికిరాని వార్తల వల్ల మేం ఎంతలా ఇబ్బందిపడతామో మీకు తెలుసా? ఇలాంటి వదంతులను ఏ మాత్రం పట్టించుకోకపోవడం వల్లే ఈ విలేకరి తరచూ ఇటువంటి వార్తలనే రాస్తోంది. అవి కాస్త సోషల్‌మీడియాలో ట్రెండ్‌ అయ్యి అందరూ వాటిని నిజాలే అని నమ్ముతున్నారు. ఇకనైనా ఇలాంటివి చేయడం మానండి. మా వ్యక్తిగత జీవితాలతో ఆడుకునే ధైర్యం చేయొద్దు’’ అని అర్జున్‌ కపూర్‌ హెచ్చరించారు.

49 ఏళ్ల మలైక.. 2017లో అర్బజ్ ఖాన్‌ నుంచి విడాకులు తీసుకున్నారు. ఈక్రమంలోనే ఆమెకు అర్జున్‌ కపూర్‌తో పరిచయం ఏర్పడింది. ఎంతోకాలం నుంచి రిలేషన్‌లో ఉన్న వీరిద్దరూ గతేడాది తమ ప్రేమను అధికారికంగా వెల్లడించారు. మలైక ప్రెగ్నెంట్‌ అని, త్వరలోనే వీరిద్దరూ పెళ్లి చేసుకోనున్నారని ఇటీవల నెట్టింటిలో పోస్టులు, కథనాలు దర్శనమిచ్చాయి. ఈవిషయంపైనే అర్జున్‌ సీరియస్‌ అయ్యారు.