Chiranjeevi: చిన్నారి టాలెంట్‌కు చిరంజీవి ఫిదా.. ఇంటికి పిలిచి ఆశీర్వదించిన మెగాస్టార్‌

హైదరాబాద్‌: టాలెంట్‌ ఉన్న వారిని ప్రోత్సహించడంలో మెగాస్టార్‌ (Chiranjeevi) ఎప్పుడూ ముందుంటారు. తాజాగా ‘తెలుగు ఇండియన్‌ ఐడల్‌ సీజన్ 2’ కంటెస్టెంట్‌ అయ్యన్‌ ప్రణతి ప్రతిభకు చిరంజీవి ఫిదా అయ్యారు. ఆమెను ఇంటికి పిలిచి అభినందించారు. వైజాగ్‌కు చెందిన ప్రణతి తన సింగింగ్‌తో అందరినీ ఆశ్చర్యపరుస్తోంది. తెలుగు ఆడియన్స్‌తో పాటు ఎందరో సినీ ప్రముఖులు ఈ చిన్నారిపై ప్రశంసలు కురిపించారు. తాజాగా మెగాస్టార్‌ కూడా ఆమె టాలెంట్‌ను మెచ్చుకున్నారు. ఇంటికి పిలిపించుకుని అన్నమాచార్య కీర్తనను పాడించుకున్నారు. చిరంజీవి దంపతులు ఆమెతో కాసేపు సరదాగా గడిపారు. ప్రస్తుతం దీనికి సంబంధించిన ఫొటోలు నెట్టింట వైరలవుతున్నాయి.

ఇక మెగాస్టార్‌తో కలిసి సమయాన్ని గడపడం తనకెంతో ఆనందంగా ఉందని ప్రణతి పేర్కొంది. ‘చిరంజీవి సినిమాలు చూస్తు పెరిగిన నేను.. ఆయన ముందు పాడడం మాటల్లో చెప్పలేని అనుభూతినిచ్చింది. ఇది నాకు దక్కిన గౌరవంగా భావిస్తాను. ఎన్నో రోజుల కల ఈరోజు నెరవేరింది.  ఆయన్ని కలిసిన తర్వాత నాలో ఆత్మవిశ్వాసం మరింత పెరిగింది. రానున్న ఎపిసోడ్‌లలో ఇంకా బాగా పాడాలని చిరు దంపతులు నన్ను ఆశీర్వదించారు’ అని తెలిపింది. ప్రముఖ ఓటీటీ ప్లాట్‌ఫామ్‌ ‘ఆహా’ వేదికగా ‘తెలుగు ఇండియన్‌ ఐడల్‌ సీజన్‌ 2’ (Telugu Indian Idol 2)  ప్రసారమవుతోంది. స్టార్‌ మ్యూజిక్‌ డైరెక్టర్‌ తమన్‌, గాయకుడు కార్తిక్‌, గాయని గీతామాధురి ఈ కార్యక్రమానికి న్యాయ నిర్ణేతలుగా వ్యవహరిస్తున్నారు.