ఓ ప్రజానాయకా.. తెలుగుతల్లి పాడుతోంది నీ గీతిక:ఎన్టీఆర్‌ పాటపై బాలయ్య స్పందన

హైదరాబాద్‌: తెలుగు వెండితెరపై ధ్రువతారగా వెలిగిన నటుడు.. నందమూరి తారకరామ రావు. సినీరంగంలోనే కాదు, రాజకీయాల్లోనూ తనదైన ముద్ర వేశారు. ఇటీవల ఆయన జీవితాన్ని రచయిత, నిర్మాత అశ్విన్‌ అట్లూరి పాట రూపంలో ఆవిష్కరించారు. ఈ పాటకు ఎస్కే బాజీ సంగీతం సమకూర్చారు. అంజనా సౌమ్య, స్వరాగ్‌ ఆలపించారు. తాజాగా ఈ పాటపై ఎన్టీఆర్‌ తనయుడు, నటుడు బాలకృష్ణ సోషల్‌మీడియా వేదికగా స్పందించారు.

‘‘నవరస నటనా సార్వభౌమ, రాజకీయ భీష్మ, ప్రజాభీష్ట నందమూరి తారక రామ మహాప్రస్థానాన్ని పాటగా రచించి, నిర్మించిన అశ్విన్ అట్లూరి గారికి.. వారి బృందానికి నా అభినందనలు. ‘నందమూరి తారక రామామృత’ గీతాన్ని అద్భుతంగా ఆదరిస్తున్న అన్నగారి అభిమానులకు, తెలుగు ప్రేక్షకులకు నా కృతఙ్ఞతలు’’అని సోషల్‌మీడియా పోస్టులో బాలకృష్ణ పేర్కొన్నారు. ఓ ప్రజానాయకా.. తెలుగుతల్లి పాడుతుంది నీ గీతిక అంటూ.. ఆ పాటను జత చేశారు.