Beast: యాక్షన్‌ ‘బీస్ట్‌’

‘‘నేను రాజకీయ నాయకుడ్ని కాదు.. సైనికుడ్ని’’ అంటున్నారు కథానాయకుడు విజయ్‌. ఇప్పుడాయన నెల్సన్‌ దిలీప్‌ కుమార్‌ దర్శకత్వంలో నటించిన చిత్రం ‘బీస్ట్‌’. సన్‌ పిక్చర్స్‌ సంస్థ నిర్మించింది. పూజా హెగ్డే కథానాయిక. ఈ సినిమా ఈనెల 13న ప్రేక్షకుల ముందుకు రానుంది. ఈ నేపథ్యంలోనే శనివారం ట్రైలర్‌ విడుదల చేశారు. ఈ సినిమాలో విజయ్‌ ఇండియన్‌ స్పైగా వీర రాఘవన్‌ అనే శక్తిమంతమైన పాత్రలో కనిపించనున్నారు. ఓ షాపింగ్‌ మాల్‌లో ఉగ్రవాదులు చొరబడటం.. వాళ్లను మట్టుబట్టేందుకు విజయ్‌ రంగంలోకి దిగడం వంటి సన్నివేశాలతో ట్రైలర్‌ ఆసక్తికరంగా సాగింది. యాక్షన్‌ ఎపిసోడ్స్‌లో విజయ్‌ చాలా స్టైలిష్‌గా కనిపించారు. సినిమాలో యాక్షన్‌కు పెద్ద పీట వేసినట్లు అర్థమవుతోంది. ఈ సినిమాకి అనిరుధ్‌ స్వరాలందించారు. మనోజ్‌ పరమహంస ఛాయాగ్రాహకుడిగా వ్యవహరించారు.