Bheemla Nayak: హిందీలోకి ‘భీమ్లా నాయక్‌’.. ట్రైలర్‌ కట్‌ అదిరింది

ఇంటర్నెట్‌ డెస్క్‌: తెలుగు ప్రేక్షకుల్ని విశేషంగా అలరించిన ‘భీమ్లా నాయక్‌’ సినిమా బాలీవుడ్‌లోకి వెళ్తుంది. ‘బీ 4 యు మోషన్‌ పిక్చర్స్‌’ సంస్థ ఈ చిత్రాన్ని హిందీలో విడుదల చేస్తోంది. ఇదే విషయాన్ని తెలియజేస్తూ సోషల్‌ మీడియా వేదికగా ట్రైలర్‌ను పంచుకుంది. తెలుగు ట్రైలర్‌కు కాస్త విభిన్నంగా, తక్కువ నిడివితో రూపొందించిన ఈ ట్రైలర్‌ అందరినీ ఆకట్టుకునేలా ఉంది. ఈ సినిమా హిందీ వెర్షన్‌ అతి త్వరలోనే విడుదలకానుంది. మలయాళ సూపర్‌ హిట్‌ ‘అయ్యప్పనుమ్‌ కోషియుమ్‌’కు రీమేక్‌గా తెరకెక్కిందీ ఈ చిత్రం. తెలుగు నేటివిటీ, పవన్‌ కల్యాణ్‌ ఇమేజ్‌ను దృష్టిలో పెట్టుకుని స్క్రిప్టులో చేసిన మార్పులు మంచి విజయాన్ని అందించాయి. సాగర్‌ కె. చంద్ర దర్శకత్వం వహించిన ఈ చిత్రానికి త్రివిక్రమ్‌ మాటలు, స్క్రీన్‌ప్లే అందించారు. రానా కీలక పాత్ర పోషించిన ఈ సినిమాలో నిత్య మేనన్‌, సంయుక్త మేనన్‌ కథానాయికలు. సితార ఎంటర్‌టైన్‌మెంట్స్‌ నిర్మించిన ఈ సినిమాకి తమన్‌ స్వరాలందించారు.