Bichagadu 2 review: రివ్యూ: బిచ్చగాడు-2

Bichagadu 2 review: చిత్రం: బిచ్చగాడు2; నటీనటులు: విజయ్‌ ఆంటోనీ, కావ్యథాపర్‌, రాధారవి, వైజీ మహేంద్రన్‌, మన్సూర్‌ అలీఖాన్‌, హరీశ్‌ తదితరులు; సంగీతం: విజయ్‌ ఆంటోనీ; సినిమాటోగ్రఫీ: ఓం నారాయణ్‌; ఎడిటింగ్‌: విజయ్‌ ఆంటోనీ; నిర్మాత: ఫాతిమా విజయ్‌ ఆంటోనీ; బ్యానర్‌: విజయ్‌ ఆంటోనీ ఫిల్మ్‌కార్పొరేషన్‌; దర్శకత్వం: విజయ్‌ ఆంటోనీ; విడుదల: 19-05-2023

‘నకిలీ’ చిత్రంతో తెలుగు ప్రేక్షకుల పరిచయమై ‘సలీమ్‌’తో మంచి గుర్తింపు తెచ్చుకున్న నటుడు విజయ్‌ ఆంటోనీ. ఆ తర్వాత ఆయన నటించిన ‘బిచ్చగాడు’ తెలుగులో ఘన విజయం సాధించింది.  అప్పటి నుంచి విజయ్‌ నటించిన ప్రతి తమిళ చిత్రం తెలుగులో విడుదలవుతూనే ఉంది. అయితే, ‘బిచ్చగాడు’ స్థాయి విజయాన్ని ఆయన అందుకోలేకపోయారు. ఈ క్రమంలోనే ‘బిచ్చగాడు2’ అంటూ తాజాగా ప్రేక్షకుల ముందుకు వచ్చారు. (bichagadu 2 review) మరి ఇంతకీ ఈ బిచ్చగాడి కథేంటి? విజయ్‌ ఆంటోనీ ఎలా నటించారు?

కథేంటంటే: వి.జి.గ్రూప్‌ వ్యాపార సంస్థలకు అధిపతి విజయ్‌ గురుమూర్తి (విజయ్‌ ఆంటోని). దేశంలోనే 7వ అత్యంత ధనవంతుడు. అతని ఆస్తి కొట్టేయాలని స్నేహితుడు అరవింద్‌ (దేవ్‌ గిల్‌) అదే సంస్థలో పని చేస్తున్న మరికొందరు మిత్రులతో కలిసి కుట్ర పన్నుతాడు. అందుకోసం విజయ్‌ మెదడు మార్పిడి ప్రయోగం చేయాలని నిర్ణయించుకుంటాడు. రూ.140కోట్లు ఖర్చు చేసి సత్య (విజయ్‌ ఆంటోని) అనే బిచ్చగాడి మెదడును గురుమూర్తి తలలో అమర్చుతాడు. అయితే సత్యది మరో కథ. అతనికి రాణి అనే చెల్లి ఉంటుంది. చిన్నప్పుడే తల్లిదండ్రులు చనిపోతే ఆదుకునే వాళ్లు లేక రోడ్డున పడతాడు. అదే సమయంలో ఓ వ్యక్తి చేసిన మోసం వల్ల తన చెల్లి తప్పిపోతుంది. ఆమె కోసం వెతుకున్న సమయంలోనే అనుకోకుండా అరవింద్‌ కుట్రకు బలైపోతాడు. మరి సత్య మెదడు విజయ్‌ గురుమూర్తికి అమర్చాక ఏం జరిగింది? అతనిని అడ్డం పెట్టుకొని విజయ్‌ ఆస్తి దక్కించుకోవాలనుకున్న అరవింద్‌కు సత్య ఎలా బుద్ధి చెప్పాడు? (bichagadu 2 review) తప్పిపోయిన తన చెల్లిని కనిపెట్టేందుకు ఏం చేశాడు? ఈ క్రమంలో అతనికి ఎదురైన సవాళ్లేంటి? పేద ప్రజల కోసం మొదలు పెట్టిన యాంటీ బికిలీ మాల్‌ ఏమైంది? దాని విషయంలో ఎదురైన రాజకీయ సవాళ్లను ఎలా అధిగమించాడు? తెలియాలంటే సినిమా చూడాల్సిందే!

ఎలా సాగిందంటే: ఇది ‘బిచ్చగాడు’కు కొనసాగింపు చిత్రమే అయినా ఆ కథకూ ఈ కథకు ఎక్కడా పోలిక ఉండదు. తొలి భాగం పూర్తిగా అమ్మ సెంటిమెంట్‌ నేపథ్యంలో సాగితే.. ఈ చిత్రం చెల్లి సెంటిమెంట్‌ చుట్టూ తిరుగుతుంది. అయితే మొదటి భాగంతో పోలిస్తే ఇందులో కథ పరంగా అనేక లోపాలు కనిపిస్తాయి. అలాగే చెల్లి సెంటిమెంట్‌ను అంత ప్రభావవంతంగా హత్తుకునేలా చూపించలేకపోయారు. ప్రధమార్ధంలో వచ్చే మెదడు మార్పిడి కాన్సెప్ట్‌ను చూసినప్పుడు తెలుగులో వచ్చిన ‘ఇస్మార్ట్‌ శంకర్‌’ గుర్తొస్తుంది. నిజానికి ఇందులో గురుమూర్తి ఆస్తి కాజేయడానికి అతని స్థానంలోకి అలాగే ఉన్న మరో వ్యక్తిని తీసుకొచ్చినా సరిపోతుంది. (bichagadu 2 review) ఎలాగూ ఈ కథలో హీరో పాత్రలు దాదాపు ఒకే పోలికలతో కనిపిస్తాయి. కానీ, మెదడు మార్పిడి అనే పాయింట్‌ను తీసుకొచ్చి కథకు కొత్తదనం అద్దాలని ప్రయత్నించారు. సినిమా ఆరంభంలో వచ్చే ఈ బ్రెయిన్‌ ట్రాన్‌ప్లాంటేషన్‌ సన్నివేశాలు ఆసక్తికరంగానే ఉంటాయి. కానీ, దాని వల్ల కథకు అదనంగా చేకూరిన ప్రయోజనం ఏమీ కనిపించదు. విజయ్‌ గురుమూర్తి గతంలో పెద్దగా డెప్త్‌ కనిపించదు. ‘‘చెల్లి వినవే’’ పాటతో సత్య పాత్ర గతాన్ని పరిచయం చేసిన తీరు బాగుంది. ముఖ్యంగా ఆ పాటలో సత్య తన చెల్లి రాణితో కలిసి ఎదుర్కొన్న కష్టాలను హృదయానికి హత్తుకునేలా చూపించారు. సత్య మెదడుతో విజయ్‌ గురుమూర్తి బయట ప్రపంచంలోకి అడుగు పెట్టినప్పటి నుంచి కథ వేగం పుంజుకుంటుంది. అరవింద్‌ను.. అతని గ్యాంగ్‌ను సత్య చంపడంతో ప్రథమార్ధానికి విరామమిచ్చిన తీరు ఆకట్టుకుంది. ఈ క్రమంలో వచ్చే యాక్షన్‌ ఎపిసోడ్‌ ప్రేక్షకులకు మంచి హై ఇస్తుంది.

అయితే ప్రథమార్ధం వరకు మంచి స్క్రీన్‌ప్లేతో ఆసక్తికరంగా సాగిన కథ.. ద్వితీయార్ధంలో కాస్త గాడి తప్పింది. సామాజిక సేవ విషయమై హీరో పదే పదే ఊకదంపుడు ఉపన్యాసాలు ఇవ్వడం విసుగు పుట్టిస్తుంది. ఓవైపు తనకు బోలెడంత డబ్బు, పరపతి ఉన్నా చెల్లిని వెతికేందుకు సత్య మళ్లీ బిచ్చగాడి వేషం కట్టడం సిల్లీగా అనిపిస్తుంది. (bichagadu 2 review) పేద ప్రజలకు సహాయం చేయాలని అతను ‘యాంటి బికిలీ’ అనే మాల్‌ను ప్రారంభించడం.. దాని గురించి ఓ భారీ సభ పెట్టి సుదీర్ఘ ఉపన్యాసం ఇవ్వడం.. ఈ సీక్వెన్స్‌ అంతా అసలు కథను పూర్తిగా పక్కదోవ పట్టించినట్లు తోస్తుంది. సత్యకు ఎప్పుడైతే రాజకీయ సవాళ్లు ఎదురవుతాయో అప్పుడు మళ్లీ కథ కాస్త రసవత్తరంగా మారుతుంది. సత్యను బెదిరించేందుకు ముఖ్యమంత్రి ఓ రౌడీ మూకను పంపడం.. వాళ్లను అతను చితక్కొటి కౌంటరివ్వడం.. ఆ యాక్షన్‌ సీక్వెన్స్‌ అంతా ఆకట్టుకునేలా ఉంటుంది. క్లైమాక్స్‌కు ముందు వచ్చే కోర్టు రూం డ్రామా మరీ సినిమాటిక్‌గా అనిపిస్తుంది. పతాక సన్నివేశాలు భావోద్వేగభరితంగా సాగుతాయి. ఆ ముగింపు ప్రేక్షకుల మదిని బరువెక్కిస్తుంది.

ఎవరెలా చేశారంటే: నటుడిగా విజయ్‌ ఆంటోని (vijay antony) ప్రతిభ గురించి కొత్తగా మాట్లాడుకునే పనిలేదు. నటన పరంగా తన పాత్రను అవలీలగా చేసుకుంటూ వెళ్లిపోయాడు. ముఖ్యంగా పతాక సన్నివేేశాల్లో భావోద్వేగభరితమైన నటనతో కంటతడి పెట్టిస్తాడు. ఇక దర్శకుడిగా ఇది ఆయనకు తొలి చిత్రమే అయినా ఆ ప్రభావం తెరపై ఎక్కడా కనిపించదు. మంచి అనుభవమున్న దర్శకుడిలా తెరపై ప్రతిభ చూపించాడు. రాసుకున్న కథలో చాలా లోపాలున్నా.. మాస్‌ ఎలిమెంట్స్, ఎమోషన్స్‌ మూమెంట్స్‌ వాటిని మర్చిపోయేలా చేస్తాయి. ద్వితీయార్ధాన్ని మరింత పగడ్బందీగా తీర్చిదిద్దుకొని ఉంటే సినిమా మరోస్థాయిలో ఉండేది. సంగీత పరంగానూ ఈ చిత్రానికి విజయ్‌ తన వంతు న్యాయం చేశారు. (bichagadu 2 review) చాలా సన్నివేశాల్లో తన నేపథ్య సంగీతంతో హీరోయిజాన్ని ఆకట్టుకునేలా ఎలివేట్‌ చేయగలిగారు. పాటలు మాత్రం పూర్తిగా తేలిపోయాయి. ఏ ఒక్కటీ గుర్తుంచుకునేలా ఉండదు. కావ్య థాపర్‌ అందంగా కనిపించింది. నటన పరంగా ఆమెకు కొత్తగా చూపించే ఆస్కారం ఏమీ దొరకలేదు. దేవ్‌ గిల్, రాధా రవి, జాన్‌ విజయ్, హరీష్‌ పేరడి తదితరుల పాత్రలు పరిధి మేరకు ఉన్నాయి. యోగిబాబు కామెడీ సరిగా పండలేదు. ఛాయాగ్రహణం చిత్రానికి అదనపు ఆకర్షణ తీసుకొచ్చింది. నిర్మాణ విలువలు ఉన్నతంగా ఉన్నాయి.

• బలాలు
• + విజయ్‌ నటన
• + యాక్షన్, ఎమోషన్స్‌
• + పతాక సన్నివేశాలు
• బలహీనతలు
• - కథనం సాగిన తీరు
• - ద్వితీయార్ధం
• చివరిగా: మాస్‌ ప్రేక్షకులు మెచ్చే ‘బిచ్చగాడు’ (bichagadu 2 review)
• గమనిక: ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!