Bigg Boss Telugu 5: హౌస్‌ నుంచి జెస్సీ ఔట్‌..!

హైదరాబాద్‌: బిగ్‌బాస్‌ హౌస్‌ నుంచి జస్వంత్‌ పడాల అలియాస్‌ జెస్సీ బయటకు వెళ్లాడు. ఈ వారం నామినేషన్స్‌లో సన్నీ, మానస్‌, కాజల్‌, సిరి, రవి ఉన్న సంగతి తెలిసిందే. శనివారం సన్నీ సేవ్‌ అవ్వగా, ఆదివారం సిరి, రవి నామినేషన్స్‌ నుంచి బయటపడ్డారు. చివరిగా మానస్‌, కాజల్‌ మధ్య పోటీ నెలకొనగా, ఇద్దరూ సేవ్‌ అయినట్లు నాగార్జున ప్రకటించారు. ఈ సారి నామినేషన్స్‌లో ఉన్న వాళ్లలో కాజల్‌కు అతి తక్కువ ఓట్లు పడ్డాయి. అయితే, ఆమె స్ట్రాంగ్‌ కంటెస్టెంట్‌ కావడం, స్ట్రాటజీతో గేమ్స్‌ ఆడటం, టాస్క్‌లోనూ తనదైన ముద్రవేయడంతో కాజల్‌ను కొనసాగించాలని బిగ్‌బాస్ టీమ్‌ భావించిందట. ఎలాగూ జెస్సీ వెళ్లిపోతున్నాడు కాబట్టి, అతడి స్థానంలో కాజల్‌ను కొనసాగించినట్లు తెలుస్తోంది.

ఆ ఇద్దరితో కలిసి ఎక్కువగా..

మోడల్‌, టెలివిజన్‌ యాక్టర్ అయిన జస్వంత్‌ ‘బిగ్‌బాస్‌ సీజన్‌-5’లోకి 8వ కంటెస్టెంట్‌గా అడుగుపెట్టాడు. జెస్సీ మొదటి నుంచి సిరి, షణ్ముఖ్‌తో కలిసి ఉండేవాడు. ఈ ముగ్గురిని త్రిమూర్తులు అంటూ హౌస్‌మేట్స్‌ ఆటపట్టించేవారు. నాలుగోవారం జరిగిన కెప్టెన్సీ టాస్క్‌లో జెస్సీ గెలిచి ఇంటి కెప్టెన్‌గా బాధ్యతలు నిర్వహించాడు. ఇక జెస్సీ, సన్నీ మధ్య తరచూ వాగ్వాదం జరుగుతుండేది. ఆ తర్వాత స్నేహితులుగానూ మారారు. ‘బంగారు కోడిపెట్ట’ టాస్క్‌ సందర్భంగా బిగ్‌బాస్‌ జెస్సీకి సీక్రెట్‌ టాస్క్‌ ఇచ్చాడు. ఈ క్రమంలో షణ్ముఖ్‌ తన ఎగ్స్‌ వదులుకున్నాడు. అయితే, టాస్క్‌ సరిగా అర్థం చేసుకోలేని జెస్సీ అందులో విఫలమయ్యాడు. అలాగే, థర్మాకోల్‌ బ్యాగ్స్‌ టాస్క్‌కు సంచాలక్‌గా వ్యవహరించిన సమయంలోనూ టాస్క్‌ను సరిగా అర్థం చేసుకోలేక పోవడంతో బిగ్‌బాస్‌ చురకలు అంటించాడు.

చికిత్స తీసుకున్నా తగ్గని సమస్య..

గత కొద్దిరోజులుగా అనారోగ్యంతో బాధపడుతున్నా ఓర్చుకుని గేమ్‌ ఆడుతున్నాడు జెస్సీ. అయితే, గతవారం రోజులుగా వర్టికో సమస్య తీవ్రమవడంతో హౌస్‌ నుంచి బయటకు రావాల్సిందిగా బిగ్‌బాస్‌ ఆదేశించాడు. దీంతో వైద్యులతో చికిత్స ఇప్పించి, సీక్రెట్‌ రూమ్‌లో ఉంచారు. అప్పటి నుంచి హౌస్‌లో జరిగే విశేషాలను జెస్సీ సీక్రెట్‌ రూమ్‌ నుంచి వీక్షిస్తూ ఉన్నాడు. శనివారం హోస్ట్‌ నాగార్జున కూడా జెస్సీ ఆరోగ్యం గురించి ఆరా తీశారు. ‘ఇంకా సమస్య తగ్గలేదు’ అని జెస్సీ చెప్పాడు. దీంతో వైద్యుల సూచన మేరకు నిర్ణయం తీసుకుందామని నాగార్జున అన్నారు. ఈ క్రమంలో జెస్సీని ఇంటి నుంచి బయటకు పంపడం ఒక్కటే మార్గమని బిగ్‌బాస్‌ టీమ్‌ భావించించింది. ఈవారం నామినేషన్స్‌లో లేకపోయినా జెస్సీ అనారోగ్యాన్ని దృష్టిలో పెట్టుకుని బిగ్‌బాస్ అతడిని ఇంటి నుంచి పంపాడు.