‘రాంబో’ దర్శకుడు ధావన్‌?

ముంబయి: ప్రముఖ హాలీవుడ్‌ చిత్రం ‘రాంబో’ని హిందీలో రీమేక్‌ చేయడానికి ఎప్పటి నుంచో సన్నాహాలు జరుగుతున్నాయి. హాలీవుడ్‌లో సిల్వర్‌స్టర్‌ స్టాలోన్‌ నటించిన ఆ చిత్రం ప్రపంచవ్యాప్తంగా భారీ విజయం సాధించింది. హిందీ రీమేక్‌లో టైగర్‌ ష్రాఫ్‌ నటిస్తున్నాడు. ఈ చిత్రాన్ని 2018లో షూటింగ్‌ మొదలుపెట్టి 2019లో విడుదల చేయాలనుకున్నారు. కానీ సినిమా ఆగిపోయింది. ముందు నుంచీ ఈ చిత్రానికి ‘వార్‌’ చిత్ర దర్శకుడు సిద్ధార్థ్‌ ఆనంద్‌ దర్శకత్వం వహిస్తారని అనుకున్నారు. మారిన పరిస్థితుల దృష్ట్యా రోహిత్‌ ధావన్‌ ఈ సినిమాకు దర్శకత్వం వహించనున్నట్టు సమాచారం.

యశ్‌రాజ్‌ ఫిలిమ్స్‌లో షారుఖ్‌ఖాన్‌తో చేయబోయే సినిమా బిజీలో ఉన్నారు సిద్ధార్థ్‌. అందువలన రోహిత్‌ చేతికి ఈ ప్రాజెక్టు వచ్చిందని బాలీవుడ్‌ సమాచారం. రోహిత్‌ ధావన్‌ ప్రస్తుతం ‘అల వైకుంఠపురములో..’ హిందీ రీమేక్‌ను కార్తిక్‌ ఆర్యన్‌తో తెరకెక్కించే పనిలో ఉన్నారు. ఈ సినిమా వచ్చే ఏడాది సెట్స్‌పైకి వెళ్లే అవకాశాలున్నాయి. ఇది పూర్తయ్యాకా వచ్చే ఏడాది చివర్లో ‘రాంబో’ హిందీ రీమేక్‌పై ధావన్‌ దృష్టిపెట్టనున్నారట. ప్రస్తుతం టైగర్‌ ష్రాఫ్‌ ‘హీరోపంటి 2’ చిత్రంలో నటిస్తున్నారు.