Bullet Song: నయా ‘బుల్లెట్టు’తో ఉర్రూతలూగిస్తున్న ‘వారియర్‌’.. పాడిందెవరో తెలుసా?

ఇంటర్నెట్‌ డెస్క్‌: ‘నీ బుల్లెట్టు బండెక్కి వచ్చేస్తా పా’ అంటూ గాయని మోహన భోగరాజు సంగీత అభిమానుల్ని ఓ ఊపు ఊపింది. ‘బంగార్రాజు’ సినిమాలోని ‘బంగారా బంగారా.. బుల్లెట్టెక్కి వచ్చేయ్‌రా’ పాటతో మధుప్రియ విశేషంగా అలరించింది. అలా ‘బుల్లెట్టు బండి’ ఇటీవల ఓ ట్రెండ్‌ సెట్‌ చేసింది. తాజాగా మరో ‘బుల్లెట్టు’ దూసుకొచ్చి, ఉర్రూతలూగిస్తోంది. ఈ పాటను పాడిందెవరో కాదు తమిళ ప్రముఖ నటుడు శింబు. ఈయన గతంలోనూ కొన్ని తెలుగు పాటలు పాడి అలరించాడు. ఈ పాటలోనూ తనదైన మార్క్‌ ‘విని’పించాడు. ‘కమాన్‌ బేబీ లెట్స్‌ గో ఆన్‌ ది బుల్లెట్టు’ అంటూ సాగే ఈ సాంగ్‌కు శింబుతో గాయని హరిప్రియ శ్రుతి కలిపింది. దేవిశ్రీ ప్రసాద్‌ సంగీతం, శ్రీమణి సాహిత్యం, రామ్‌- కృతి డ్యాన్స్‌ అందరినీ ఆకట్టుకునేలా ఉన్నాయి.

రామ్, కృతిశెట్టి జంటగా దర్శకుడు లింగుస్వామి తెరకెక్కిస్తున్న ‘ది వారియర్‌’ చిత్రంలోని గీతమిది. ఇందులో రామ్‌.. శక్తిమంతమైన పోలీసు అధికారిగా కనిపించనున్నాడు. యాక్షన్‌ నేపథ్యంలో సాగే ఈ ప్రాజెక్టును శ్రీనివాసా చిట్టూరి నిర్మిస్తున్నారు. ఈ చిత్రాన్ని జులై 14న ప్రేక్షకుల ముందుకు తీసుకురానున్నారు. ఈ నేపథ్యంలోనే ‘బుల్లెట్‌’ పాటతో ప్రచారాన్ని ప్రారంభించారు. తెలుగు, తమిళ భాషల్లో ఈ సినిమా విడుదలకానుంది.