Upasana: ప్రేమలో ఉండటం అంత సులభం కాదు: ఉపాసన

తమ అన్యోన్యతకు గల రహస్యాన్ని చెప్పిన చెర్రీ సతీమణి

హైదరాబాద్‌: ‘‘ప్రేమలో పడటం సులభమే కానీ దానిలో ఉండటం పార్క్‌లో సరదాగా నడిస్తూ కాలక్షేపం చేసినంత ఈజీ కాదు’’ అని అంటున్నారు నటుడు రామ్‌చరణ్‌ సతీమణి ఉపాసన. వాలంటైన్స్‌ డేని సందర్భంగా నెటిజన్లకు ఆమె ఓ ఆసక్తికర విషయాన్ని తెలిపారు. చరణ్‌తో తన వివాహమై 10 సంవత్సరాలైందని.. తమ మధ్య అన్యోన్యతకు గల రహస్యాన్ని ఆమె తెలియజేశారు. జీవితభాగస్వామి లేదా ప్రియమైన వారితో మన బంధం ఎప్పుడూ సంతోషంగా సాగాలంటే ఏం చేయాలో చెప్పారు.

‘‘నేను చరణ్‌ పెళ్లి చేసుకుని పదేళ్లు అయ్యింది. వాలంటైన్స్‌ డే నాకు ఎప్పుడూ ప్రత్యేకమే. ప్రియమైన వారితో మీ బంధం మరింత బలంగా మారేందుకు ఈ టిప్స్‌ ఫాలో అవ్వండి.
♡ వివాహ బంధంలో ఆరోగ్యానికి ముఖ్యస్థానం ఉంది. కాబట్టి మనం ఆరోగ్యంపై ఎక్కువగా శ్రద్ధపెట్టాలి. ప్రతిరోజూ ఉదయాన్నే నిద్రలేవాలి.
♡ ప్రియమైన వారితో కొద్ది సమయాన్ని గడపటం రొటీన్‌గా మార్చుకోవాలి. ఏ కాస్త ఖాళీ దొరికినా డిన్నర్‌ డేట్‌, సినిమాలు చూడటం, కబుర్లు చెప్పుకోవడం.. ఇలా చేయడం వల్ల మీ జీవితం మరింత అందంగా మారుతుంది. ఒకవేళ మీరు కనుక ఇది ఫాలో కాకపోతే ఇప్పటికైనా దయచేసి మీ వారి కోసం సమయాన్ని కేటాయించడం తెలుసుకోండి.
♡ ప్రతిఒక్కరూ పెళ్లిళ్లు స్వర్గంలో నిర్ణయిస్తారంటారు. కానీ, అది నిజం కాదు. భూమ్మీద ఇద్దరు వ్యక్తులు ఎంతో శ్రమిస్తేనే వివాహానికి పునాది పడుతుంది. వీటితోపాటు ఎదుటివ్యక్తిపై అమితమైన ప్రేమ, గౌరవం చూపించాలి’’ అని ఉపాసన చెప్పుకొచ్చారు.