Nawazuddin siddiqui: ఇప్పుడిదో ఫ్యాషన్‌ అయిపోయింది

ఇంటర్నెట్‌ డెస్క్‌: ‘కేజీయఫ్-2’, ‘ఆర్‌ఆర్‌ఆర్‌’ సినిమాలకు బాలీవుడ్‌లో విశేష స్పందన లభించిన విషయం తెలిసిందే. అదే సమయంలో దక్షిణాది సినిమాలను అక్కడ రీమేక్‌ చేసేందుకు దర్శక-నిర్మాతలు ఆసక్తి చూపుతున్నారు. ఈ విషయంపై రామ్‌గోపాల్‌ వర్మ లాంటి వారు ఇప్పటికే బాలీవుడ్‌కు చురకలు అంటిస్తున్నారు. తాజాగా హిందీ నటుడు నవాజుద్దీన్‌ సిద్ధిఖీ ఈ విమర్శలపై ఆసక్తికర వ్యాఖ్యలు చేశారు.

ఒక సినిమా హిట్టయితే అంతా ఏకమై దాన్ని ఆకాశానికెత్తడం, అంతగా కలెక్షన్లు రాకుంటే వెంటనే విమర్శలు ఎక్కుపెట్టడం సాధారణమేనన్నారు. ఇప్పుడిదో ఫ్యాషన్‌ అయిపోయిందని.. ఈ పరిస్థితులు ట్రెండ్ లాగా ఎప్పటికప్పుడు మారుతుంటాయని తెలిపారు. బాలీవుడ్‌కు ఒక్క బ్లాక్‌ బస్టర్‌ పడితే అంతా సర్దుకుంటుందని అన్నారు. లాక్‌డౌన్‌లో అంతర్జాతీయ సినిమాలు చూసిన ప్రేక్షకుడి అభిరుచిలో మార్పు వస్తుందని ఊహించానన్నారు. మసాలా కంటెంట్‌తో వస్తున్న సినిమాలను ప్రేక్షకులు ఆదరిస్తున్నారు. కానీ ఈ మార్పు అంత మంచిది కాదంటూ స్పందించారు.

అయితే తాము కూడా హీరో పంటి-2 వంటి కమర్షియల్‌ సినిమాతోనే ప్రేక్షకుల ముందుకు వస్తున్నామని..  కలెక్షన్ల పరంగా తమ సినిమా కూడా భారీ వసూళ్లు రాబట్టాలని కోరుకుంటున్నానన్నారు. ఈ ఏడాది పాన్‌ ఇండియా స్థాయిలో విడుదలైన దక్షిణాది సినిమాలు బాలీవుడ్‌లోనూ కలెక్షన్ల సునామీ సృష్టించిన విషయం తెలిసిందే.