Pathu Thala: వారికి థియేటర్‌లోకి నో ఎంట్రీ.. వీడియో వైరల్‌..

ఇంటర్నెట్‌ డెస్క్‌: తమిళనాడు రాజధాని చెన్నైలో ఓ థియేటర్‌ సిబ్బంది ప్రేక్షకులపై వ్యవహరించిన తీరు విమర్శలకు దారి తీసింది. సంబంధిత వీడియోను పలువురు ట్విటర్‌లో షేర్‌ చేయగా అది వైరల్‌ అయింది. ఆ ఘటనపై నెటిజన్లు ఆగ్రహం వ్యక్తం చేస్తూ ఏకంగా సినిమా థియేటర్‌ను బాయ్‌కాట్‌ చేయాలంటూ (#BoycottRohiniTheatre) పోస్ట్‌లు పెట్టారు. దాంతో యాజమాన్యం ఈ వివాదంపై సోషల్‌ మీడియా వేదికగా వివరణ ఇచ్చింది.

జరిగిందేంటంటే?.. తమిళ్‌ స్టార్‌ హీరో శింబు (Simbu) నటించిన తాజా చిత్రం ‘పతు తలా’ (Pathu Thala). శ్రీరామ నవమి సందర్భంగా మార్చి 30న విడుదలైంది. ఈ సినిమా చూసేందుకు  రోహిణి థియేటర్‌కు భారీ సంఖ్యలో ప్రేక్షకులు వెళ్లారు. అయితే, వారిలో గిరిజన కుటుంబానికి చెందిన కొందరిని థియేటర్‌ సిబ్బంది లోపలికి అనుమతించలేదని, టిక్కెట్‌ ఉన్నా ఆ కుటుంబాన్ని థియేటర్‌ బయటే నిలిపివేశారంటూ కొందరు వీడియోలు పోస్ట్‌ చేశారు. నెటిజన్లతోపాటు పలువురు సినీ ప్రముఖులూ దానిపై స్పందించారు. థియేటర్‌ సిబ్బంది తీరును తప్పు పడుతూ ట్వీట్లు చేశారు. చివరకు థియేటర్‌ యాజమాన్యం ఓ ప్రకటన ద్వారా వివరణ ఇచ్చింది. 

‘‘ఈ సినిమాకు సెన్సార్‌ బోర్డు యూ/ఏ సర్టిఫికేట్‌ ఇచ్చింది. కాబట్టి చట్టప్రకారం 12 ఏళ్ల లోపు పిల్లలను అనుమతించకూడదు. ఆ కుటుంబం 12 ఏళ్ల లోపు ఉన్న నలుగురు పిల్లలతో కలిసి వచ్చింది. అందుకే వాళ్లని మా సిబ్బంది ఆపేశారు. తర్వాత కొంత సేపటికి వారిని అనుమతించాం’’ అంటూ అందుకు సంబంధించిన వీడియోను పోస్ట్‌ చేసింది. అయితే నెటిజన్లు ఈ వివరణను అంగీకరించలేదు.సమగ్రమైన విచారణ జరపాలని డిమాండ్‌ చేస్తున్నారు.