Lata Mangeshkar: లతా దీదీ లేరంటే గుండె పగిలినట్లుంది: చిరంజీవి

హైదరాబాద్‌: భారతరత్న లతా మంగేష్కర్‌ మృతిపట్ల తెలుగు సినీ ప్రముఖులు తీవ్ర దిగ్భ్రాంతి వ్యక్తం చేశారు. సినీరంగానికి ఆమె చేసిన సేవలను కొనియాడారు. ఈ మేరకు ట్వీట్లు చేశారు.

‘‘నైటింగేల్‌ ఆఫ్‌ ఇండియా, గొప్ప లెజెండ్‌లలో ఒకరైన లతా దీదీ ఇక లేరంటే గుండె పగిలినట్లు ఉంది. లతా మంగేష్కర్‌ అసాధారణ జీవితాన్ని గడిపారు. ఆమె సంగీతం ఎప్పటికీ సజీవంగా ఉంటుంది. ఆమె ఆత్మకు శాంతి చేకూరాలి’’- చిరంజీవి, ప్రముఖ నటుడు

‘‘లత మృతి దేశానికే కాదు.. సంగీత ప్రపంచానికే తీరని లోటు. ఆమె పొందని అవార్డు.. రాని రివార్డు లేదు. విదేశాలు కూడా పురస్కారాలతో లతను గౌరవించాయి. లత కుటుంబసభ్యులకు ప్రగాఢ సానుభూతి తెలుపుతున్నా’’-బాలకృష్ణ, ప్రముఖ నటుడు

‘‘లతాజీ మరణం తీరని లోటు. ఆమె ఎప్పటికీ మన హృదయాల్లో నిలిచి ఉంటారు. భారతదేశపు నైటింగేల్‌కు నా హృదయపూర్వక నివాళి. ఆమె ఆత్మకు శాంతి చేకూరాలి. ఈ కష్ట సమయాల్లో కుటుంబ సభ్యులకు ధైర్యాన్నివ్వాలని కోరుకుంటున్నాను’’ - రాజమౌళి, ప్రముఖ దర్శకుడు

‘‘లతా మంగేష్కర్‌ మరణవార్త తీవ్రంగా కలచివేసింది. తరతరాలుగా భారతీయ సంగీతాన్ని నిర్వచించిన స్వరం ఆమెది. ఆమె సేవలు నిజంగా అసమానమైనవి. ఆమెలాంటి వారు మరొకరు రాబోరు. కుటుంబ సభ్యులకు, ఆత్మీయులకు, ఆమె అభిమానులందరికీ సానుభూతి తెలుపుకొంటున్నా’’ - మహేశ్‌బాబు, ప్రముఖ నటుడు

‘‘లతా మంగేష్కర్‌ మృతి దేశానికి తీరనిలోటు. ఆమె మధురగాత్ర మహారాణి. ఎంతోమంది కొత్తతరం గాయకులకు లత స్ఫూర్తి ప్రదాత’’- ప్రముఖ నటుడు జూనియర్‌ ఎన్టీఆర్‌