Chiranjeevi: బన్నీ.. అందుకు నాకెంతో ఆనందంగా ఉంది: చిరంజీవి

హైదరాబాద్‌: తన మేనల్లుడు, ఐకాన్‌స్టార్‌ అల్లు అర్జున్‌ (Allu Arjun)ను మెగాస్టార్‌ చిరంజీవి (Chiranjeevi) అభినందించారు. నటుడిగా బన్నీ 20 ఏళ్లు పూర్తి చేసుకున్నందుకు మెచ్చుకుంటూ చిరు తాజాగా ఓ ఆసక్తికర ట్వీట్‌ చేశారు. బన్నీ మరెన్నో విజయాలు అందుకోవాలని ఆకాంక్షించారు.

‘‘డియర్‌ బన్నీ.. సినీ పరిశ్రమలో నువ్వు 20 ఏళ్లు పూర్తి చేసుకున్నందుకు సంతోషంగా ఉంది. నీ చిన్ననాటి రోజులు నా మదిలో ఇంకా అలాగే ఉన్నాయి.. సమయం ఎంతో వేగంగా గడిచిపోయింది కదా..! ఒక సాధారణ నటుడిగా అడుగుపెట్టి పాన్‌ ఇండియా స్టార్‌, ఐకాన్‌ స్టార్‌గా నువ్వు ఎదగడం చూస్తుంటే చెప్పలేనంత ఆనందంగా ఉంది. రానున్న రోజుల్లో నువ్వు మరెన్నో విజయాలు, ప్రేక్షకుల మన్ననలు అందుకోవాలని ఆశిస్తున్నా’’ అని చిరంజీవి (Chiranjeevi) పేర్కొన్నారు.

చిరంజీవి నటించిన ‘విజేత’, ‘డాడీ’ సినిమాల్లో బన్నీ బాలనటుడిగా కనిపించారు. ‘గంగోత్రి’తో హీరోగా ఎంట్రీ ఇచ్చిన అల్లు అర్జున్‌ క్లాస్‌, మాస్‌ ప్రేక్షకులను అలరించే కథల్లో నటించారు. స్టైలిష్‌ స్టార్‌గా దక్షిణాది ప్రేక్షకులను అలరించిన ఆయన 2021లో విడుదలైన ‘పుష్ప’ (Pushpa)తో ఐకాన్‌స్టార్‌గా ఎదిగారు. ఆ సినిమాతో ఆయన ప్రపంచవ్యాప్తంగా సినీ ప్రియుల మన్ననలు అందుకున్నారు. ప్రస్తుతం ఆయన ‘పుష్ప-2’ పనుల్లో బిజీగా ఉన్నారు.