Chiranjeevi: ‘గాడ్‌ ఫాదర్‌’ విడుదల తేదీ ఫిక్స్‌ అయిందా?

ఇంటర్నెట్‌డెస్క్‌: చిరంజీవి(Chiranjeevi) కథానాయకుడిగా మోహన్‌రాజా దర్శకత్వంలో తెరకెక్కుతున్న చిత్రం ‘గాడ్‌ ఫాదర్‌’. బాలీవుడ్‌ హీరో సల్మాన్‌ఖాన్‌ కీలక పాత్ర పోషిస్తున్నారు. శరవేగంగా చిత్రీకరణ జరుపుకొంటున్న ఈ సినిమాకు సంబంధించి ఓ ఆసక్తికర వార్త చక్కర్లు కొడుతోంది. ‘గాడ్‌ ఫాదర్‌’ రిలీజ్‌ డేట్‌పై చిత్ర బృందం ప్రస్తుతం చర్చలు జరుపుతోందట. ప్రస్తుతం సల్మాన్‌-చిరులపై ఓ పాటను చిత్రీకరిస్తున్నారు. ఇది అభిమానులను ప్రత్యేకంగా అలరించనుందని సమాచారం. ఈ క్రమంలోనే సినిమాను ఆగస్టులో రిలీజ్‌ చేసేందుకు సన్నాహాలు చేస్తున్నారని సమాచారం. స్వాతంత్ర్యదినోత్సవ కానుకగా ఆగస్టు 12న సినిమాను ప్రేక్షకుల ముందుకు తీసుకురావాలని భావిస్తోందట. అయితే, చిత్ర బృందం నుంచి ఎలాంటి అధికారిక ప్రకటనా వెలువడలేదు. నయనతార, సత్యదేవ్‌ కీలక పాత్రల్లో నటిస్తున్న ఈ సినిమాకు తమన్‌ మ్యూజిక్‌ డైరెక్టర్. ఆర్‌.బి.చౌదరి, ఎన్వీ ప్రసాద్‌ సంయుక్తంగా నిర్మిస్తున్నారు. కొణిదెల సురేఖసమర్పిస్తున్నారు. మలయాళంలో ఘన విజయం సాధించిన ‘లూసిఫర్‌’‘(Lucifer) రీమేక్‌గా ఈ చిత్రం తెరకెక్కుతోంది.