Chiranjeevi: సామ్‌ కోసం చిరంజీవి ట్వీట్‌..

హైదరాబాద్‌: నటి సమంతను (Samantha) ఉద్దేశిస్తూ అగ్ర కథానాయకుడు, మెగాస్టార్‌ చిరంజీవి (Chiranjeevi) తాజాగా ఓ ట్వీట్‌ చేశారు. సామ్‌ త్వరగా కోలుకోవాలని కోరుకున్నారు. ‘‘డియర్‌ సామ్‌.. కాలానుగుణంగా మన జీవితాల్లో ఎన్నో సవాళ్లు ఎదురవుతుంటాయి. వాటివల్ల మనకెంతటి శక్తి సామర్థ్యాలు ఉన్నాయో తెలుస్తుంది. మనోబలం కలిగిన అద్భుతమైన అమ్మాయివి నువ్వు. అతి త్వరలో ఈ సమస్యను నువ్వు అధిగమిస్తావనే నమ్మకం నాకు ఉంది’’ అని చిరు ధైర్యం చెప్పారు.

ఎంతో కాలం నుంచి సోషల్‌మీడియాకు దూరంగా ఉన్న సమంత శనివారం సాయంత్రం తన అనారోగ్య పరిస్థితిని తెలియజేస్తూ ఓ పోస్ట్‌ పెట్టారు. తాను ‘మయోసైటిస్‌’తో ఇబ్బందిపడుతున్నట్లు చెప్పారు. ప్రస్తుతం తాను చికిత్స తీసుకుంటున్నానని, త్వరలో దీని నుంచి కోలుకుంటానని పేర్కొన్నారు. ఈ నేపథ్యంలోనే సినీ తారలందరూ ఆమెలో ఆత్మస్థైర్యం నింపేలా సోషల్‌మీడియాలో పోస్టులు పెడుతున్నారు.