Chiranjeevi: అతడిని చూస్తే చాలు పొట్ట చెక్కలవుతుంది.. బ్రహ్మానందాన్ని విష్‌ చేసిన చిరంజీవి

హైదరాబాద్‌: తెలుగు సినీ ప్రపంచంలో హాస్యనటుడు బ్రహ్మానందానికి(Brahmanandam) ఓ ప్రత్యేక స్థానం ఉంటుంది. ఆయన హాస్యం వల్ల హిట్‌ అయిన సినిమాలు ఎన్నో ఉన్నాయి. ఇప్పటి వరకు కొన్ని వందల సినిమాల్లో నటించిన ఆయన.. తెరపై కనిపించినప్పుడల్లా ప్రేక్షకులను కడుపుబ్బా నవ్విస్తుంటారు.  గిన్నిస్‌బుక్‌ రికార్డును కైవసం చేసుకున్న ఈ హాస్యబ్రహ్మ పుట్టినరోజు నేడు. ఈ సందర్భంగా ఆయనకు సినీ ప్రముఖులు శుభాకాంక్షలు చెబుతున్నారు. నెటిజన్లు సోషల్‌మీడియా వేదికగా ఆయన్ని విష్‌ చేస్తున్నారు.

బ్రహ్మానందం పుట్టినరోజు సందర్భంగా చిరంజీవి(Chiranjeevi) ట్వీట్‌ చేశారు. ‘‘నాకు తెలిసిన బ్రహ్మానందం అత్తిలిలో ఓ లెక్చరర్‌. ఈ రోజున బ్రహ్మానందం ప్రపంచంలోనే అత్యధిక చిత్రాల్లో నటించి, గిన్నిస్‌ బుక్‌ ఆఫ్‌ వరల్డ్‌ రికార్డు సొంతం చేసుకున్న గొప్ప హాస్య నటుడు, పద్మశ్రీ అవార్డు గ్రహీత. కామెడీకి నిలువెత్తు నిదర్శనం. అతడు కామెడీ చెయ్యక్కర్లేదు.. అతడి వైపు చూస్తేనే హాస్యం వెల్లివిరుస్తుంది. పొట్ట చెక్కలవుతుంది. ఇలాంటి  బ్రహ్మానందానికి హృదయపూర్వక శుభాభినందనలు. ఆయన ఇలాగే జీవితాంతం నవ్వుతూ, పదిమందిని నవ్విస్తూ ఉండాలని కోరుకుంటున్నాను. తనకి నా జన్మదిన శుభాకాంక్షలు’’ అని రాశారు. బ్రహ్మానందంతో దిగిన ఫొటోలను చిరంజీవి షేర్‌ చేశారు.