బ్రహ్మానందం చిత్రం: ఆంజనేయుని తన్మయత్వం

ఇంటర్నెట్‌ డెస్క్‌: లాక్‌డౌన్‌ సమయంలో సినీతారలంతా కొత్త విషయాలు నేర్చుకోవడమో.. ఉన్న నైపుణ్యాన్ని అభిమానులతో పంచుకోవడమో చేస్తున్నారు. ఈ క్రమంలో టాలీవుడ్‌ హాస్యనటుడు బ్రహ్మానందం కూడా తనకున్న చిత్రకళను మరోసారి బయటపెట్టారు. ఇటీవల కరోనాపై బ్రహ్మానందం ఓ అద్భుతమైన చిత్రం గీశారు. తాజాగా అయోధ్యలో రామ మందిర నిర్మాణానికి శంకుస్థాపన జరిగింది. ఈ  సందర్భంగా ఆయన మరో చిత్రం గీశారు. ఇందులో రాముడిని ఆలింగనం చేసుకున్న ఆంజనేయుడు తన్మయత్వంతో ఆనందబాష్పాలు కారుస్తున్నట్లుగా ఉంది. రాముడికి గుడి కడుతున్న వేళ హనుమంతుడు ఇలాగే ఆనందపడుతున్నాడేమో అన్నట్లుగా కనిపిస్తోంది. బ్రహ్మానందం గీసిన ఈ చిత్రానికి నెటిజన్ల నుంచి ప్రశంసల వర్షం కురుస్తోంది. చిత్రం అద్భుతంగా ఉంది.. మీలో గొప్ప ప్రతిభ ఉంది అంటూ నెటిజన్లు కామెంట్లు పెడుతున్నారు.