Dasara: ధరణి.. వెన్నెల గుర్తుండిపోతారు

‘‘దసరా’ (Dasara) మాకు చాలా ఎమోషనల్‌ సినిమా. ఈ చిత్రంతో రివార్డులు, అవార్డులు మొదలవుతాయి. ఇలాంటి మరెన్నో సినిమాలు చేయడానికి ఇది ఆరంభమవుతుందని భావిస్తున్నా’’ అన్నారు నాని (Nani). ఆయన, కీర్తి సురేష్‌ (Keerthy Suresh) జంటగా నటించిన ఈ పాన్‌ ఇండియా చిత్రాన్ని శ్రీకాంత్‌ ఓదెల తెరకెక్కించారు. సుధాకర్‌ చెరుకూరి నిర్మాత. ఈనెల 30న విడుదల కానుంది. ఈ నేపథ్యంలో ఇటీవల హైదరాబాద్‌లో విలేకర్ల సమావేశం ఏర్పాటు చేశారు. ఈ సందర్భంగా హీరో నాని మాట్లాడుతూ.. ‘‘ఈ చిత్రం థియేటర్స్‌లో పూనకాలు తెప్పిస్తుంది. మార్చి 30 తర్వాత నాని, కీర్తి సురేష్‌ పేర్లు మాయమైపోయి ధరణి, వెన్నెల మాత్రమే గుర్తుంటారు. శ్రీకాంత్‌ గురించి చాలా గొప్పగా మాట్లాడుకుంటారు’’ అన్నారు. ‘‘ఇందులో నేను చేసిన వెన్నెల పాత్ర నాకెంతో ప్రత్యేకం. ఇది ప్రేక్షకులకు బాగా గుర్తుండిపోతుంది. ఇక థియేటర్లలో కుమ్మేద్దాం అంతే’’ అంది నాయిక కీర్తి సురేష్‌. ఈ కార్యక్రమంలో శ్రీకాంత్‌ ఓదెల, దీక్షిత్‌ శెట్టి, ఝాన్సీ, నాగబాబు తదితరులు పాల్గొన్నారు.