Kalyan Ram: ఆ రోజే ‘అమిగోస్‌’

‘బింబిసార’ లాంటి విజయం తర్వాత కల్యాణ్‌ రామ్‌ (Kalyan Ram) నుంచి వస్తున్న చిత్రం ‘అమిగోస్‌’ (Amigos). మైత్రీ మూవీ మేకర్స్‌ సంస్థ నిర్మిస్తున్న ఈ సినిమాతో రాజేంద్ర రెడ్డి దర్శకుడిగా పరిచయమవుతున్నారు. ఆషికా రంగనాథ్‌ కథానాయిక. ఈ చిత్రం ఫిబ్రవరి 10న విడుదల కానున్న నేపథ్యంలో ప్రచార పర్వాన్ని పరుగులు పెట్టిస్తోంది చిత్ర బృందం. ఇందులో భాగంగా ఈ నెల 8న ఉదయం 11:07గంటలకు టీజర్‌ విడుదల చేయనున్నారు. ఈ విషయాన్ని గురువారం అధికారికంగా ప్రకటించారు. ఈ మేరకు కల్యాణ్‌రామ్‌ మూడో పాత్రకు సంబంధించిన ఫస్ట్‌లుక్‌ను పంచుకున్నారు. ఈ చిత్రంలో ఆయన మూడు పాత్రల్లో కనిపించనున్న సంగతి తెలిసిందే. ఓ పాత్రలో సిద్ధార్థ్‌ అనే వ్యాపారవేత్తగా, మరో పాత్రలో మంజునాథ్‌ అనే సాఫ్ట్‌వేర్‌ ఇంజినీర్‌గా కనిపించగా.. ఈ మూడో పాత్రలో గుబురు గడ్డం, పొడవాటి జుత్తుతో చేతిలో గన్‌ పట్టుకొని ఆసక్తికరంగా కనిపించారు. ఒకే పోలికలతో ఉన్న ముగ్గురు వ్యక్తుల కథతో రూపొందుతోన్న చిత్రమిది. వినూత్నమైన యాక్షన్‌ థ్రిల్లర్‌గా ముస్తాబవుతోంది. ఈ చిత్రానికి సంగీతం: జిబ్రాన్‌, ఛాయాగ్రహణం: సౌందర్‌ రాజన్‌.