‘సర్కస్‌’లో దీపిక స్టెప్పులు

ముంబయి: రణ్‌వీర్‌ సింగ్, దీపికా పదుకొణె జంట తెరపైనా, బయటా చేసే సందడి గురించి ప్రత్యేకంగా చెప్పక్కర్లేదు. నిజ జీవితంలో భార్యాభర్తలైన ఈ జంట తెరపై కనిపించిన ప్రతిసారి అభిమానులకు పండగే. ఈ ఇద్దరు పలు చిత్రాల్లో జంటగా నటించి అలరించారు. రణ్‌వీర్‌ తాజా చిత్రం ‘83’లోనూ ఓ కీలక పాత్రలో నటిస్తోంది దీపిక. ఇప్పుడు మరోసారి ఈ జంట తెరపై అలరించడానికి సిద్ధమవుతున్నట్టు సమాచారం. రోహిత్‌శెట్టి దర్శకత్వంలో రణ్‌వీర్‌ నటిస్తున్న చిత్రం ‘సర్కస్‌’. ఈ చిత్రంలోని ఓ ప్రత్యేక గీతంలో దీపిక ఆడిపాడనుందట. ఇప్పటికే దీపికకు సంబంధించిన గీతాన్ని పూర్తి చేసినట్టు బాలీవుడ్‌ సమాచారం. తను నటించే ప్రతిష్టాత్మక చిత్రంలోనూ దీపిక ఉండటం శుభసూచికంగా భావిస్తాడట రణ్‌వీర్‌.