Deepika Padukone: ఆస్కార్‌ ప్రజెంటర్‌గా దీపికా పదుకొణె.. ఫొటో షేర్‌ చేసిన నటి

ఇంటర్నెట్‌డెస్క్‌: బాలీవుడ్‌ నటి దీపికా పదుకొణె (Deepika Padukone) మరో విశేష గౌరవాన్ని సొంతం చేసుకున్నారు. ప్రపంచ చలనచిత్ర రంగంలో ప్రతిష్ఠాత్మకంగా భావించే ఆస్కార్‌ (Oscars) అవార్డుల ప్రదానోత్సవంలో ఆమె ప్రజెంటర్‌గా పాల్గొననున్నారు. ఎమిలీ బ్లంట్‌, మైఖెల్‌ బి జోర్డాన్‌, శామ్యూల్‌ ఎల్‌ జాక్సన్‌, డ్వేన్‌ జాన్సన్‌, జోయ్‌ సాల్డానా వంటి హాలీవుడ్‌ ప్రముఖులతో కలిసి దీపిక.. అకాడమీ అవార్డులు అందించనున్నారు. ఈ విషయాన్ని ఇన్‌స్టా వేదికగా తెలియజేసిన ఆమె ఇలాంటి గౌరవాన్ని సొంతం చేసుకున్నందుకు ఆనందం వ్యక్తం చేశారు. మరోవైపు, గతేడాది జరిగిన కేన్స్‌ ఫెస్టివల్‌లో జ్యూరీ సభ్యురాలు, ఫిఫా వరల్డ్‌ కప్‌ ప్రజెంటర్‌గానూ దీపిక వ్యవహరించారు.

మార్చి 12న జరగనున్న ఆస్కార్‌ (Oscars) అవార్డుల ప్రదానోత్సవానికి సర్వం సిద్ధమవుతోంది. లాస్‌ ఏంజెల్స్‌లోని డాల్బీ థియేటర్‌లో ఈ వేడుక జరగనుంది. హాలీవుడ్‌కు చెందిన సినీ ప్రముఖులు ఈ వేడుకలో సందడి చేయనున్నారు. మన దేశం తరఫు నుంచి ‘ఆర్‌ఆర్‌ఆర్‌’ (RRR) బృందం ఇందులో పాల్గొననుంది. ఈ సినిమాలోని ‘నాటు నాటు’ (Naatu Naatu) పాట ఉత్తమ ఒరిజినల్‌ సాంగ్‌ కేటగిరిలో ఆస్కార్‌కు నామినేట్‌ అయ్యింది. కాలభైరవ, రాహుల్‌ లైవ్‌లో ఈ పాటను ఆలపించనున్నారు.