Dhamaka: ఇకపై పండగ మీద పండగే

‘‘ధమాకా’కి (Dhamaka) అభిమానులు చేసిన హడావిడి ఇంతా అంతా కాదు. పండగ చేసుకొని రెండేళ్లయింది. మళ్లీ ఇప్పుడు ఈ చిత్రంతో పండగొచ్చింది. ఇకపై పండక్కి గ్యాప్‌ ఇవ్వొద్దు. పండగ మీద పండగ చేసుకోవాలి’’ అన్నారు రవితేజ (Raviteja). ఆయన.. శ్రీలీల (Sreeleela) జంటగా నటించిన ఈ చిత్రాన్ని త్రినాథరావు నక్కిన తెరకెక్కించారు. టీజీ విశ్వప్రసాద్‌ నిర్మించారు. ఈ సినిమా ఇటీవల విడుదలైన నేపథ్యంలో తాజాగా హైదరాబాద్‌లో మాస్‌ సక్సెస్‌ వేడుక నిర్వహించారు. ఈ సందర్భంగా హీరో రవితేజ మాట్లాడుతూ.. ‘‘ఈ చిత్ర విజయానికి తొలి కారణం.. మా సంగీత దర్శకుడు భీమ్స్‌ సిసిరోలియో. ఈ సినిమాకి సాలిడ్‌ సౌండ్‌ ఇచ్చాడు. తన సంగీతంతో చిత్రాన్ని మరో స్థాయికి తీసుకెళ్లాడు. పీపుల్స్‌ మీడియా ఈ సినిమాని ఎంతో చక్కగా ప్రమోట్‌ చేశారు. ఈ బ్యానర్‌లో మరిన్ని సూపర్‌ హిట్లు రావాలి. నాయిక శ్రీలీల ఈ చిత్రానికి మరో ఆకర్షణ. తను రాబోయే రోజుల్లో పెద్ద స్టార్‌ అవుతుంది’’ అన్నారు. ‘‘రవితేజ డ్రమ్ము వాయిస్తేనే ఆరోజుల్లో ‘అల్లరి ప్రియుడు’ 250రోజులు ఆడింది. ఇప్పుడు డ్రమ్ము వాయిస్తే థియేటర్లు దద్దరిల్లిపోయాయి’’ అన్నారు దర్శకుడు కె.రాఘవేంద్రరావు. ఈ కార్యక్రమంలో హరీష్‌ శంకర్‌, త్రినాథరావు, శ్రీలీల, వివేక్‌ కూచిభొట్ల, భీమ్స్‌ తదితరులు పాల్గొన్నారు.