Dhamaka: ట్రైలర్‌తో ‘ధమాకా’

‘ధమాకా’తో (Dhamaka) వినోదాలు పంచేందుకు సిద్ధమయ్యారు రవితేజ (Raviteja). ఆయన కథానాయకుడిగా నటించిన ఈ చిత్రాన్ని త్రినాథరావు నక్కిన తెరకెక్కించారు. టీజీ విశ్వప్రసాద్‌ నిర్మించారు. శ్రీలీల కథానాయిక. ఈ సినిమా ఈనెల 23న ప్రేక్షకుల ముందుకు రానుంది. ఈ నేపథ్యంలోనే ప్రచార పర్వాన్ని వేగవంతం చేసింది చిత్ర బృందం. ఇందులో భాగంగా ఈనెల 15న ట్రైలర్‌ విడుదల చేయనున్నారు. ఈ విషయాన్ని ఆదివారం అధికారికంగా ప్రకటించారు. ఈ మేరకు ఓ కొత్త పోస్టర్‌ను సామాజిక మాధ్యమాల్లో పంచుకున్నారు. ఆ ప్రచార చిత్రంలో రవితేజ సూట్‌ ధరించి.. కళ్లజోడుతో స్టైలిష్‌గా కనిపించారు. ఇందులో ఆయన ద్విపాత్రాభినయం చేస్తున్నారు. ఈ సినిమాకి ప్రసన్న కుమార్‌ బెజవాడ కథ, స్క్రీన్‌ప్లే, సంభాషణలు అందించారు. భీమ్స్‌ సిసిరోలియో సంగీత దర్శకుడు. కార్తీక్‌ ఘట్టమనేని ఛాయాగ్రాహకుడిగా వ్యవహరించారు.